Cacafougna (stroete plake)

Èn årtike di Wikipedia.
Coviete del plake

"Cacafougna", c' est ene sitroete plake di tchansons e walon des "Droles di Lodjeus" k' a vudî e 2008.

Les tchansons ont stî scrîtes pa Jean-Pierre Vervier k' e-st eto compôzé l' musike (apus kel cene del prumire tchanson "Broûler mes aiyes"). C' est eto lu k' est l' produjheu del plake.

Li tite vént do vî djouwet k' est rdessiné sol livret et k' on loméve : on cacafougna.

Corwaitaedje[candjî | candjî l’ côde wiki]

Tos les tecses des 20 tchansons sont foirt powetikes. Come di djusse po les tchansons ås tecses, li muzike n' est nén stofante, po poleur profiter des paroles. Li melodeye est sovint bén adaptêye å tinme del tchanson :

  • a môde di slô pol 2inme tchanson, la k' on djåze d' on valet mo romantike.
  • a môde di muzike di fiesse, bén ritmêye, pol l° 5, la k' on dvize djustumint do cacafougna k' on veyeut so les dicåces.
  • ene miete poenneuse pol l° 6, la k' on cåze do boubiè do hamtea.
  • a môde di bossanova pol l° 8, djustumint la kel tchanteuse sondje end aler dins les lons payis.

N' a kel prumire ki n' va nén bén : li muzike est djoyeuse, et on djåze d' on påwion ki s' broûle ses aiyes al loumire.

Les tchanteus sont Jean-Pierre Darras et Gilberte Mattina. Les muzikeus : Jean-Marie Adam (batreye), Philippe Libois (piyano), Paul Talbot et Djhan-Pire Vervî (ambedeus al guitåre). I s' acpagntèt cobén d' ene muzike di sintetijheu, come cwand il ont dandjî do son d' ene trompete.

Tenawete, gn a on brutaedje u ene muzike difoûtrinne ki vént sotni l' tecse, metans :

  • Dins l° 4 (påjhûle pormoennåde), li brut d' l' aiwe ki court, dabôrd ki li tchanteu s' mådjene addé on rew :
(Li) ci ki s' ewaere d' èn ombion so l' aiwe
Et ki schoûte tchanter l' rew.
  • Dins l' l° 20 (Avou on côp di spale do Bon Diu), li scrijheu dmande di l' aidance po fé ene tchanson; li Bon Diu abroke et lyi dene totès sôres d' idêyes; dins l' erî-fond, on-z ôt del muzike di messe, djouwêye pa ene ôre.

Li stîle djenerå, c' est del tchanson a môde des anêyes 1990, avou l' livea d' ene boune pitite otoproduccion.[1]

Cåzaedje d' ene des tchansons del plake[candjî | candjî l’ côde wiki]

Les lons payis
Dj' endè va-st ås lons payis
Et çoula, sins bodjî;
Sins valijhe, sins saetch a mes rins,
Sins tiket d' otocår d' avion u d' trin.
Dj' endè va-st ås lons payis
Po des voyaedjes sondjîs,
Lon erî des cawêyes d' otos,
Des viyaedjes di toele k' odèt l' ôle,
Po l' solo.
Mes lons voyaedjes, dj' elzès fwai tote seule,
Påjhûlmint
Avou on live divins les mwins
Mes avinteures, dj' elzès vike divintrinnmint.
Les lives, c' est mes bons copleus
Tote pitite, dji m' rivoe
Avou ene lampe di potche e m' mwin
Rafûlêye tiesse, et tot, po k' on n' mi voeye nén.
Cwand l' måjhone s' essoctéve,
C' est adon k' dj' end aléve.
Des feyes, c' esteut po l' Amerike;
Èn ôte côp, dj' aléve ritrover "Moby Dick"'
Mes lons voyaedjes, dj' elzès fwai tote seule,
Påjhûlmint
Avou on live divins les mwins. (respondeu : Avou on live divins ses mwins.)
Mes avinteures, dj' elzès vike divintrinnmint. (respondeu : Ses avinteures, ele les vike divintrinnmint.)
"Sol rote", avou "Jack Kérouac",
Des sondjes plin m' håversak,
A pî dschås dvins les nûlêyes,
Dji n' m' a måy polou mete sol ton del vraiye veye,
Li vraiye veye,
Kéne corwêye !

Hårdêye difoûtrinne[candjî | candjî l’ côde wiki]

Sourdants[candjî | candjî l’ côde wiki]

  1. Corwaitaedje da Jérôme Swevers, muzicyin.