Copene:Jacques Desmet

Le contenu de la page n’est pas pris en charge dans d’autres langues.
Èn årtike di Wikipedia.

Mélin. Vëladje dë nos parints, Vëladje dë d' quand dj' èsto gamin. A-dje djamb'lé së vos pavéyes ! A-dje bèrôlé dins vos foncias ! À l' nîve, au solia, së vos-ûréyes ! Mélin. Ô, m' bia p'tët vëladje ! Quates pëtëts amias Covés pa d'zos nosse blanc clotchi Quë pwate së coq jësqu'aus nûléyes.

A-dje vèyë ? Nos stindéyes dë vèt', au mwès d' mây, Nos pachës caflorës, avou l' bon timps, Nos stindéyes dë scaugnes d'ous d' l'èsté. Nos pawas dins lès chavéyes.

A-dje sintë ? Lès fornéyes dë pwins cujant dins lès fors ; Lès vènéyes èmacraler mès traus d' nez : Së ça sint lë stauve, c'èst là qu'on vëke ; Lë nwêr dë pouchêre, c'èst qu'on bat lès din.réyes.

A-dje ètindë ? Lès ritchitchi-batisse-cowitche, Lès coqs tchanter à mèsêre avou l'èclëme dè l' mârchau, Lès tchéns bawyi après lès tch'vaus, L'angélus quë sone prandjêre !

A-dje sayi ? Lès bonbons dë r'naud dins lès spënes, Lès sëcrés r'djètadjes së lès sprautes, Lès poumes cutes dins l' covèt. Lès scaflotes dë nosse gâyi.

Vëladje dë nos cinsis R'lèvés avou l' solia, Boutant jësqu'à l' vièspréye, Së leûs têres, së leûs pîces. Ardents dins leûs fîves, Au solia, à l' plaive, à l' nîve. Lë cë qu'a polë sok'ter on quârt avou zèls, Stindë dins-one mwéye dë foûre, Në vos rovîyerè jamais pës ! Vëladje dë nos tâyeûs d' pîre ! A-dje ètindë lès sclats Pèter pa d'zos vos masses ! Avoz vèyë nos blankès pîres Tayîyes avou leûs chasses ? Avoz vèyë nos blankès pîres Quë rabrèssenèt nos-intréyes, Quë moussenèt nos fënièsses, Quë sopwatenèt nos maujones ? Avoz vèyë nos blankès pîres ?...

A-dje chouté nos vis parints, À l' cîse, së l' pîre dë l' ëch Au timps dès baloûjes !

A-dje chouté nos vis parints Nos raconter dès fërdin.nes Au r'cwè, dins l' këlot !

Combén d' côps nos-ont-ës Trin.né së nos sclëdes d'èfants, Dins nos pës bias moussemints, Së l' vôye dè l' mèsse dë maiyenait !...

Dès djous, dès mwès... dès-ans ! Quë djë m' pormin.ne au lon, Sins waîre dë bon !

Dès djous, dès mwès... dès-ans ! Quë dj' a mès niêrs ; On keûr dë fiêr !...

Vaîroz avou më à Mélin, Po-z-i r'trover l' gout d' nosse pwin ? Po-z-i r'ssayi l' tchaleûr dë nos djins ?

Nos-è mète plin lès-ouy, plin lès mwins... Po fé frëm'ji nosse song, Po ratraper nosse tièsse !...

Lë djou qu' nos-èrirans, Nos r'pëdrans nos sclëdes d'èfants !

Mauj'ni.