Dj' a m' tabeur (tchanson)

«Dj' a m' tabeur» udon, pus longuinnmint, «Dj' a m' tabeur, mes clikes et mes clakes», c' est on vî cråmignon lidjwès.

Tinme

C' est on valet ki s' pa s' a rmaryî, et ki s' måråsse, nén boune po on sô, evoye come poirtchî tot timpe å matén (motoit ces mots la timpe å matén ki sont divnous «trop å matén» dins les modêyes do 20inme sieke).

I doet epoirter avou lu ene «schielete» po magnî a nonne, pindowe a s' costé. Mins les tchansnîs do 20inme sieke end ont fwait ene vierlete (èn instrumint k' on n' prindreut ddja po-z aler wårder les pourceas ås tchamps).

On lyi apoite a ddjuner «ene djate di maxheye aiwe et on boket d' pan tot tchamossî». I doet fé s' lepe, çou ki fwait rire les pourcea, et fi-z e-n aweye, li boune oumeur wangne tote li sonre et les troyes si metnut a danser.

Adon, li poirtchî prind si «xhuflet d' åwe» (çou ki mostere bén k' i n' a nole vierlete), et acpagntêye les danseus et danseuses.

Gn a k' ene troye ki n' sait danser. Dins les pus viyès modêyes, c' est ene viye. Dins l' tchanson des Crapådes, c' est ene djonne «ki n' sait moenner s' cou».

Corwaitaedje do walon

Li tchanson nos mostere des piceures pus waire eployeyes del croejhete walone.

• adjondrece «et s’» (et s' a dj' mi schielete a m' costé)
• repoirtaedje di l' infinitif al fén del fråze, a môde des lingaedjes tîxhons.

Apus k' ene tote pitite troye / Ki n' poléve si cou miner.

• des vîs mots: «schielete», «apus ki»
• des viyès ratourneures: so m' vét (dj' el djeure), ricomprins sot mvé dins l' modêye Chaumont.

Eplaidaedjes

Gn a des modêyes di dvant Feller dins l' BSLLW tôme V (1889) p. 25 & 424.

Elle a stî rprinjhe emey tchapele pa Les Crapådes sol sitroete plake A tot spiyî. Li livret k' a stî eplaidî avou dene des paroles e Feller vinant d' on live ki l' tite, c' est « Airs et cråmignons liégeois » da Léonard Terry et Léopold Chaumont.

Hårdêye difoûtrinne

so Wikisourd: Dj’ a m’ tabeur (troes modêyes, e rfondou, e Feller et dvant Feller, avou variantes)