Djihan ki ploye et Linete Makêye (arimé)

Djihan ki ploye et Linete Makêye, c' est èn arimé k' on n' sait s' il esteut tchanté u nén, ki date dandjreus del prumire mitan do 18inme sieke (1730).

L' incipite, c' est «Diewåde, mi feye, diewåde, brantchete» (Jowatte mi feye jowatte bronchette).

Elle est rprinjhe sol limero 308 dins l' clasmint Piron des vîs scrîts e walon.

Tcherpetaedje del tchanson

C' est on cåzmint a deus inte on valet lomé «Djhan ki ploye» ey ene båshele ki si ptit no, c' est «Linete».

Tecse del tchanson

Diewåde, mi feye, diewåde, brantchete
Vs estoz todi m' diyamant !
Ni tchante nén co l' ålouwete
Cwand vs estoz avå les tchamps.
Por vos, dj' a todi l' hikete
Dji n' pou pus magnî do pan
Si dji n' vis a come poyete,
Si dji n' so vost ôrtolan.

- Ci sont totès colibetes
Ki vos m' contez, loyåd Djhan!
Dji so eco trop djonnete
Po-z etertini (intrètni) des galants.
Mins dj' a ene sacwè ki m' tourmete,
Dji croe k' c' est on diåle-volant
Ki fwait ki dji so-st inkiete
Ki m' fwait awè l' trosse-galant.

- C' est l' amor k' est a l' awiete
I fåt k' il åye bén d' alant!
C' est ossu lu ki vs dispiete
Cwek' i fjhaxhe li fås doirmant.
S' i vout intrer pa vosse poite,
I n' a k' fé d' on passe-avant.
Cwand 'l a s' bounet ås xhiletes,
I fwait pé k' on ptit volant.

- Vos avoz l' linwe ki vs cactêye (cakète)
K' est tot come ene pire d' inmant
Dj' ô bén a vos tchansonetes
Ki vs avoz lî l' Alcoran.
Vos voerîz bén di m' pansete
Po magnî avou vosse pan.
Dji so come po braire «schovlete»,
Dji n' m' egadje nén pus avant.

- Po ci côp la, dji m' va piede,
Ou prindoz m' po vost amant !
Schoûtez m' don, mi ptite mouyete,
Dji so fidele et constant.
Si dj' esteu vosse lamponete,
Vos serîz m' muroe ardant...
Nos douwréns al respounete,
C' est on djeu k' est si tchårmant.

- Dji voe bén k' i fåt k' i pete;
Vos estoz trop complaijhant!
Mins si vs estoz ene trompete,
Dji serè tabeur batant!
Et po ricnoxhe nosse hobete,
Nos î metrans on crexhant...
Dji serè todi Linete
Et vos seroz todi Djhan.