Dizôrnance po s' nouri

Ene dizôrnance po s’ nouri, u pus coranmint : dizôrnance d' amagnî, pacô rascourti a DDA, c’ est cwand ene djin ni s’ nourit nén bén, a cåze d’ idêyes k’ elle a dins s’ tiesse.

Minêyolodjince

Mape daegnrece

Cas d' on valet

C’ est purade li cas des båsheles (90 å cint), ey al laidådje (12 a 25 ans).

Come di djusse, les ritches payis sont pus acsût ki l' Tîce-Monde, avou on rcôrd do monde po l' Ostraleye.

E l' Urope, li Beldjike, l' Itåleye, l' Espagne et l' Otriche ont l' air di sofri do må dipus k' les ôtes payis.

Sacwants sôres

Les golafeus

Gn a des golafeus ki magnèt po n’ nén sondjî a leu noerès idêyes.

Gn a des cis k’ ont magnî trop waire tot on tins. Pu tot d’ on côp i s’ dårèt so l’ amagnî.

Tos les golafeus, cwand il ont magnî, i rnådèt.

Les ptitès magneuses po-z esse maigues

C’ est des djonnetes ki n’ magnèt nén di sogne di groxhi. Ele volèt wårder ene taeye mankin come les cmeres k’ ele veyèt dins les fimes, al televuzion u so leu sûtifone ki rshonnèt a des popes Barbie.

Si les parints les oblidjèt a magnî, ele si vont fé rnåder après l’ eurêye. Oubén ele dijhnut a leu parints k’ elle ont må l’ vinte po n’ nén dveur magnî.

Oudonbén ele fwaiynut do spôrt dipus k’ leu foice disca toumer la.

Istwere

Li prumî discrijhaedje di l’ anorecseye del tiesse date di 1689. Li må a stî discovrou pa on medcén inglès.

Li golafreye-maladeye a stî discrîte l’ an 1859 pa on nôbe otrichyin.

Médiaedje

Èn anorecsike k’ a divnou maigue come on clå, on l’ doet miner dins on ospitå sikiatrike. On lyi va mete des basters po l’ rinouri.

Les cas ordinaires, on les sait rweri avou on shuvou sicolodjike.

Nonante malådes so 100 sont schapés dins les 5 ans.

Egzimpe di temognaedje

Dji vs è preye di s’ concintrer so ç’ messaedje ci et d’ el bén lére, s’ i vs vloz bén, et sortot nén l’ dire a xxx paski dji nel vou nén vey målureuse po des biesses cayets come ça.

Enute, dj’ a decidé di vzel dire paski dji rfuze di continouwer come ça. Ça fwait ddja deus ans ki dj’ a mes dizôrnances d’ amagnî (DDA) et c’ est vormint målåjhey, minme si dji n’ è cåze waire. Mins so ces deus ans å long, dji n’ a nén profité d’ on seu djoû sins tuzer a mes DDA.

Ça pout aparexhe biesse come maladeye mins c’ est foirt hodant d’ awè on cervea ki n’ tuze k’ a « kibén est ç' ki dji doe magnî enute ? » « dji so foirt grosse » « kibén d’ caloreyes ? » « est çki dji m' doe arester u co magnî ? ». Et, creyoz m', dj' a bråmint sayî di m’ médyî mi-minme et m’ aidî a esse come les ôtes djins.

Dji sai bén ki dji vike bén et ki dji n' mi doe nén plinde. Et, li prouve ki dji so rconoxhante, c’ est ki dj' n' a måy cåzé di mes rujhes ni a vos ni a xxx. Dj' a todi dit k' i fwaiynut dedja d' leu mî a m’ diner li meyeute vicreye possibe. Adon s’ plinde, c’ est djusse esse egoyisse.

Dispu k’ dj’ esteu ptite, dj’ a apris a tirer m’ plan tote seule sins vos disrindjî vos et xxx, et ça a bén roté tos ces ans la. Mins enute, dji voleu candjî m’ veye et viker djusse come ene djin normåle. Dj’ a scrî tot ç’ «pavé» la djusse po vs dimander si c’ est possibe di ndaler vey ene djin d’ mestî. Mi cas s’ a télmint apiri ki mes DDA ni m' leyèt waitî ki mi imådje do coir. Dji n’ mi concintere nén come divant a scole, et cwand dji so a l’ måjhon, dji n’ tuze k’ a magnî et dji magne télmint ki dj’ a do må a bodjî après. Adon si vs ploz bén sayî d’ comprinde po ç' côp ci…