Emacralaedje (sitroete plake)
Emacralaedje, c' est l' tite d' ene sitroete plake prodûte pa l' S.N.R. Li Ranteule e 1999.
Li mwaisse produjheu, c' esteut Pire Otdjåke.
C' est l' prumire plake di muzike avou on tite et on livret d' tecses e rfondou walon.
Contnou
[candjî | candjî l’ côde wiki]
Gn a cwate tchanteus, onk di tchaeke coine del Walonreye, ki s' pårtixhnut les 15 tchansons del plake.
Pol walon do Levant, c' est ene longue paskeye di cénk bokets «Les Blankès Dames et les Macrales», ki l' tite e francès «Sortilège» va dner l' lomaedje del plake etire, «Emacralaedje». Li tecse a dvou a André Gauditiaubois, ki saveut scrire e walon d' Lidje a costé di ses ouves dins l' accint di grand-mame d' après Nivele. Il est tchanté pa Valérie Malempré, so ene muzike di s' pa, Daniel Malempré (ambedeus dizo l' no d' sinne di «Målimprèye»). Gn a des passaedjes ki c' est André Gauditiaubois lu-minme ki djåze, so on fond d' muzike. Il aveut ddja prodût insi si stroete plake «Rodje Orandje».
Pol walon do Mitan, c' est Lorint Hendschel ki tchante, avou l' no di s' binde d' adon, «René Binamé eyet les rowes di rcandje». I gn a troes tchansons:
- «Djîle Copixhe»: tchanson la lu, essinnant èn ovrî d' ene fabrike d' acî ki s' dispiete a shijh eures å matén, et ndaler bouter dins l' noeristé et l' plouve, tot tuzant a s' fi «ki n' vout nén ddja bouter, ni a scole ni ôte pårt, et i s' dimande pocwè.» Et a ses voyaedje ezès lon-payis, k' i s' aveut prometou, mins… «comaxhî al plouve, i s' dimande s' il est evike.»
- «Endalaedje (depårt) pol Californeye»: riprinjhe d' on tecse da Philippe Lagrange. I discrît d' ene manire fotante, l' ebagance des Walons eviè l' Amerike e 19inme sieke. I creyént k' «e fougnant e tere, ti schoupeles di l' ôr; ti trouves on trezôr». Li muzike est da Lorint Hendschel et s' binde.
- «Li vî blanc tchvå», ki c' est on tecse ey èn air did dinltins.
Pol walon do Coûtchant, gn a troes tchansons ki les cåzaedjes sont da André Gauditiaubois eyet l' muzike da Ernest Hembersin. I sont tchantés pa Dino Forlane.
- «Poplinete blouze»: on bloûsse d' amour d' on målinmé.
- «Evoye blouze»
- «Taijhe-tu ene miete»
Pol Basse Årdene, gn a troes tchansons tchantêyes pa Bruno Picård.
- «Dji t' inme, Mariye-Jane» (cåzaedje da Bruno Picård)
- «Li voyaedjeu» (cåzaedje da Bruno Picård)
- «Li roye Sint-Djan» (cåzaedje da Lucyin Mahin)
-
coviete a pårt po «Målimpreye» -
coviete a pårt po Dino Forlane -
coviete a pårt po Bruno Picård
