Ervoye a Hesta (plake di muzike)

Ervoye a Hesta (Back to Hèsta), c' est l' tite d' ene sitroete plake da Elmore D avou 8 tites e walon et sacwants ôtes e-n inglès.

Li livret dene li cåzaedje des tchansons e walon avou ratournaedje e francès ey e-n inglès.

Tite del plake

Li tite del plake, c' est l' ci d' ene des tchansons, li limero 14. Li scrijheu, ki passe a Hesta pa on djoû k' i nive, vout rintrer dins l' måjhone ki s' mame î dmoréve estant djonne. So l' årmå, gn aveut ene foto d' lu. C' est cisse foto la k' est sol coviete do livret del sitroete plake.

Tites e walon

• Vén tocial (onk ki s' feme a fwait s' paket, et ki houke si soçon)
• Pocwè m' ass fwait çoula ? (onk ki s' feme li rind cocu)
• Nel vind nén (ene viye guitåre)
• Tot cfessant Mouze
• Li spér (ene tchanson k' aveut ddja stî rprinjhe pa Mimile sol plake Nén ene åme)
• Dji cnoxhe ene båshele
• Rivoye a Hesta (tot passant divant l' måjhone d' ene viye matante)
• Dj' a on trô e cervea

Bokets foû del plake

Vén tocial

I. Vén tocial / Dji so tot seu el måjhone / N’ a pus nouk ki m’ telefone. / Dispoy k’ elle a fwait s’ paket, / Dj’ a vormint ene påye di rwè.

II. Vén tocial / On djåzrè des femes et des toûs k’ ele nos fjhèt / Avans ns tant mezåjhe d’ amour ? / Po rovyî l’ cene k’ on vént d’ piede, / End a dijh ôtes ki ratindèt al poite.

III. Vén tocial / On trouvrè én ene botaye divins ene coine / Ene botaye k’ on boerè e l’ coujhene / Pusk’ i n’ a k’ la po s’ ashir / K’ elle a leyî deus troes tcheyires.

IV. Vén tocial / D’ abôrd, ci n’ est måy k’ ene faflote. / Cwand so mi ouy rôlrè ene pitite gote, / Ti serès bén binamé / Di t’ tourner di l’ ôte costé.

V. Vén tocial / Dji so tot seu el måjhone / I n’ a pus nouk, i n’ a pus nouk ki m’ telefone. / Dispoy k’ elle a fwait s’ paket, / Dj’ a vormint ene påye di rwè, ene påye di rwè.

Rivnou a Hesta

I nivéve so Hesta / Dji n’ sai pus çou k’ dj’ aléve fé la. / Li rouwale Peket esteut noere. / Et i n’ esteut nén minme cénk eures

C’ est a poenne si dji m’ aresta / Wice ki m’ mame, djonne feye dimora / Pocwè fåt i k’ djî tuze seulmint / Les djoûs k’ i gn a do måva tins.

Faleut souner al poite / Prinde li colidôr, djusse po vey. Å coron, come ene coû coviete / Wice ki m’ grand-mere féve les bouwêyes

Après çoula, gn aveut ene coujhene / Avou ses deus fåtûles Voltaire / Et on calindrî so l’ Årdene / Et l’ radio ki passe l’ INR

Covrant m’ fåtûle, ene sacwè d’ bea / Cozou avou des bokets d’ linne / Di pus d’ coleurs k’ end a l’ airdiè / Dji l’ atchtêye si vos avoz l’ minme.

Del sitouve, dji n’ sai pus rén. / Esteut ele plate, esteut ele ronde ? / Mins l’ årmå, et çou k’ aveut dvins / Sins bargougnî, dji vzel raconte.

E ridant d’ droete, les clés. / A hintche, les çanses, les lunetes / Å dzeu, ene andje, et sol costé / Nodjdju ! Mi avou m’ bounete.

El rowe, dji n’ a fwait k’ passer / L’ måjhone esteut dedja tote noere / Pocwè s’ arester po trover K’ i n’ a cåzu pus rén ki dmeure ?