Fabienne Desmet

Fabienne Desmet, c' est ene mwaisse veulirresse walone k' a skepyî so tere a Djiblou li 7 di fevrî 1967.

C' est l' feye da Jacques Desmet.

Biyografeye

Di s' djonnesse

Tote djonne, elle a stî asblaweye pa l' loumire des veulires.

Ses scoles ni l' ont siervou k' a fé l' mia possibe po-z ariver a s' mestî, mwaisse veulirresse.

Après li ptite sicole di Djiblou et l' mwèyène di Djodogne, ele wangne ses diplomes di pinte-graveu å 75 a Brussele.

Scolaedje po s' mestî

Mins po-z ariver a s'-t idêye, i gn a pupont di scole el Walonreye, ni el Beldjike. D' Ôrvå, on l' revoye a Anverse. Vo l' la oblidjeye do cori å lon. Ele tchait so li scole di Filozofeye et d' Årts sacrés di Cenves (el [[France), ene rastoke di l' univiersité d' Liyon. Vaila, ele rescontere des mwaisses et des årtisses k' ont l' five di leu mestî et d' tot çk' est bea.

Adonpwis, ses stadjes shuvnut n' onk l' ôte :

Verreye: adlé Monsieu Picard, mwaisse-veurlî a Chapaize
Cwårea: adlé Maria Rokeplo e l' Pologne
Pondeure so les murayes: adlé Monsieur Bellomi a Verone
Imådje : adlé Madame Tsolakis a Patmos.

Si stîle

Ele cache a bouter dins les uzances did dinltins come les mwaisses-veurlîs k' ont gårni les eglijhes et les catedråles:

Ele saye di fé ene sacwè d' novea.

Si filozofeye, c' est ki l' ouve doet rinde li plaijhi di rtrover çou k' i gn a d' meyeu dins l' cour, ki provént di çou k' nos avans-st aprins e scole, mins eto di tot çki les tayons et ratayons ont leyî.

Ouve

Elle a dessiné et fé dipus d' cénk cint veulires, tertotes nén ene come l' ôte, po des måjhons d' mierdjins, po des eglijhes et po des bastimints d' administråcion. Mins bråmint e l' France.

Ele ni fwait nén k' bouter po des eglijhes: elle overe eto come les mwaisses veurlîs did dinltins tot ragrandixhant ses ouves dins des sovnis d' bateme u d' comunion, oucobén des essegnes po des djins d' mestî.

E l' Walonreye, on pôrè aler vey ses ouves a l' eglijhe di Sint-Pire-dilé-Libråmont eyet l' tchapele di Gobtindje (prumire veulire do droet costé).