Ferdinand de Saussure

Ferdinand de Saussure

Idintité
Veur no	Ferdinand de Saussure
Nexhance	- 26 di nôvimbe 1857 - Djineve (Swisse)
Moraedje	- 22 d' fevrî 1913 - Vufflens-le-Château (Swisse)
Nåcionålité	Swisse

Ferdinand de Saussure c' esteut on rlomé linwincieus. Il est rwaitî come estant l' ahiveu del modiene linwistike. C' esteut on linwincieus do corant do structuralisse.

Ovraedje

Cours de linguistique générale

Li Cours de linguistique générale ([WA] Luçon di linwistike djeneråle), c' est on live k' a vudî e 1916, dj' ô bén troes ans après l' morance di Saussure. Cist ovraedje ci a stî vudî pa ses studiants.

Rîles d' opôzucion

Opôzucion « rimant » eyet « rimé »

Li signifiant ([WA] rimant) est l' acoustike di l' imaedje, dj' ô bén l' cogne do mo. Metans : li mo « tchivå ». Li rimant d' èç mo la sereut l' fonetike : [ʧi.'vɔ]. Mins nerén, po les lingaedjes des senes, li rimant sereut les mouvmints des mwins eyet des doets.

Li signifié ([WA] rimé) est ene atuze. Todi metans : li mot « tchivå ». Li rimé d' èç mo la sreut ci k' on s' imådjine e 's tiesse avou ç' mo la.

Opôzucion « sistinme linwistike » eyet « parole »

Li langue ([WA] sistinme linwistike), c' est on sistinme k' est kimon a ene kiminålté djåzant on lingaedje. Li langue est rwaitî come estant l' atuzêye, l' eshonna des rîles.

Li parole ([WA] parole), c' est l' uzaedje do sistinme linwistike, ça vout dire ki c' est comint amon les djins djåznut on lingaedje : s' i font des fåtes u nén, et tchik et tchak.

Opôzucion « sincroneye » eyet « diyacroneye »

Li synchronie ([WA] sincroneye), c' est l' corwaitaedje d' on lingaedje u d on boket do lingaedje a on moumint.

Li diachronie ([WA] diyacroneye), c' est l' corwaitaedje d' on lingaedje u d' on boket do lingaedje pindant on trevén.