Goydelike

Èn årtike di Wikipedia.

lingaedjes > indo-uropeyin > gayel > goydelike


Li brantche Goydelike est ene des deus grandes familes des lingaedjes gayels d' enute (l' ôte estant li Britonike). Lomé eto gayelike, ou Q-celtike la k' i wårdèt co C ou K pol kiminces des mots k' on supôze k' i cmincèt pa Qu e vî indo-uropeyin (al diferince do britonike, ki candja-st en on son P foirt diferin).

Les troes lingaedjes goydelikes co vicants enute sont l' irlandès, li gayelike escôswès, eyet l' gayelike di l' Iye di Man. Dins l' tins, les lingaedjes goydelike estént limités a l' Irlande, mins å 6inme sieke des colons irlandès ont cmincî a baguer viè l' Escôsse et displaecî l' lingaedje britonike ki s' î troveut la. Li lingaedje di Man, lu, vént do gayelike escôswès, avou bråmint des apoirts do vî norvedjyin do tins ki l' Iye di Man esteut dzo l' contrôle des Vikignes Les lingaedjes goydelikes ont stî cmons sol coisse ouwess di l' Urope celtike; i gn a des indices k' on djåzéve on lingaedje goydelike el Galice, å nôrouwess di l' Espagne.

Li irlandès est onk des deus lingaedjes oficirs di l' Irlande ey est co lådjmint cåzé, copurade e l' ouwess do payis. Ene redjon gayel-cåzante est lomêye on Gaeltacht eyet on les trouve dins les contés di Donegal, Mayo, Galway, Kerry eyet, mins nerén ene miete di moens, a Waterford eyet Meath.

Li gayelike escôswès est co cåzé å nôr eyet a l' ouwess del Sicôsse, eyet ezès Hebrides; mins e pårteye cåze do manke d' aspoya oficir, e pårteye cåze d' on ebagaedje e grand nombe, i gn a nén ostant di cåzus natifs ki davance. On pinse k' i gn a asteure (2003) kékès 1.000 cåzeus di gayelike escôssès el Nouve EscôsseCanada) eyet 60.000 el Escôsse.

Li gayelike di l' Iye di Man aveut disparetou, mins des efoirts pol raviker sont fwaits.

Les ôtes lingaedjes gayels, del brantche britonike, sont li walès, li burton, eyet li cornike k' est cåzu stindou.