Il est la, nosse pitit valet (tchanson)

Il est né le divin enfant

Il est la, nosse pitit valet, c' est ene rilomêye tchanson d' Noyé ki provént del France et ki s' î lome «Il est né le divin enfant».

Istwere

L' air provént d' ene tchanson d' tchesseu do 17inme sieke.

Li cåzaedje a stî eplaidî pol prumî côp e 1874 dins on live di tchansons d' Noyé rashonnêyes pa on lomé Jean-Romain Grosjean, k' esteut djouweu d' ôres.

Li modêye walone li pus cnoxhowe, on l' doet a Lucien Somme. Ene ôte modêye, sourdant di cisse-lale, a stî riscrîte pa Lucyin Mahin e 2021. Elle fourit tchantêye a messe di Noyé a Transene e 2021 et 2022.

Corwaitaedje do walon del modêye Somme

Li scrijheu prind des mots pus près do cåzaedje di tos les djoûs. Insi «pitit valet» est tchoezi purade ki «Bon-Diu-efant» ki sereut pus mot po mot (l' addjectif «divin» sereut sintou come on francijha).

Sifwaitmint, po «il est né», ki pôreut awè stî ratourné «il a nexhou», mins l' mot n' esteut pus waire eployî e 20inme sieke. On åreut polou eto mete «il a skepyî», mins ci mot la ki s' a spårdou e 21inme sieke, esteut foirt coinrece (Payis d' Nivele) e 20inme sieke. Adon, Lucien Somme a yeu ptchî di cwiter l' mot-po-mot, et mete: «il est la», k' on dit come «il est arivé», po ene sakî k' on ratind dispu lontins.

Ci relijha la rind l' tchanson bén pus binamêye. Ey esse pus voltî tchantêye pa des rcåzeus u des nén-djåzeus d' walon.

Lucien Somme eploye ossu des piceures di croejhete pår walones, come li codjowant infinitif:

Tchantans et l' riçure come on rwè (po: «tchantans et riçuvans l'…»).

Çoula rind l' tecse pus ledjir, tot s' houwant des repetaedjes des cawetes di codjowaedje.

Tant k' å motlî, al deujhinme roye, i prind des instrumints pus walons ki l' hôbwès et l' pipsak (muzete) del modêye francesse. Lu, c' est:

Djouwez sacsos, flûtes et clarinetes.

Hårdêyes difoûtrinnes

• Redjårbaedje Lucien Somme
• Riscrijhaedje Lucien Mahin