Kifession

El kifession, li cfession, dins li rlidjon catolike et co ds ôtes coxhes do crustinnisse, c' est cwand on creyant eva dilé on priyesse et lyi dire tos ses petchîs. Li priyesse a l' povwer di dner l' absolucion u nén, å no do Bon Diu.

Mwaissès dnêyes

On dit : aler a cfesse (a cofesse). Ça s' passe å pus sovint e l' eglijhe, dins on cfessionå. Li cfessî u li cfesseye s' adjnole so on ptit banc. I cåze å cfesseu pa ene pitite bawete avou on glindisse di bwès. Li cfessî atake tot djhant : «Monpere, dji m' acuze d' awè…» (shût l' dijhaedje del rîlêye des petchîs).

Al fén, li curé pout:

• diner ene penitince; sovint li recitaedje di priyire (ostant d' påters, ostant d' åvés).
• diner l' plantchete: i rclape ene pitite plantchete ki ristope li bawete inte zels deus, çou ki vout dire k' i rfuze di pardoner, paski les petchîs lyi parexhèt trop gros.

Sicret del kifession

Dins si rlidjon, li priyesse n' a nén l' droet di djåzer di çou k' on lyi a dit a cfesse. Ça pout comprinde des sacwès ki plèt awè des grossès consecwinces, come on moude.

Kifessions a pårt

Les catolikes si plèt cfessî ostant k' i volnut. Disk' å 20inme sieke, les bons catolikes î alént totes les samwinnes, sovint l' semdi.

Li minimom, c' esteut on côp l' an, a Påke. On djheut «fé ses påkes».

Ci cfessaedje la si passéve del floreye Påke disk' å djudi d' après Påke (cloyowe Påke). Do ci u del cene ki ratindeut l' dierin moumint, on djheut : «i u ele fwait ses påkes avou les mônîs».

Dins les ôtes coxhes do crustinnisse

Les protestants ont leyî tchaire li cfession.^{(a-z aveuri)}

Les ortodosses, les anglicans et les vîs-catolikes fwaiynut come les catolikes.

• 
  kifession ortodosse divant l' ouxh
• 
  kifessaedje catolike divant l' ouxh

Dins les fåves

Gn aveut toplin des couyonådes sol kifessaedje. End a des comifåt, dijhowes metans pa des curés. Mins å pus sovint, c' est des nén pikêyes des viers, u des fotantes.