Les tchimins sins dbouts (arimés)

Èn årtike di Wikipedia.

Les tchmins sins dbouts (Les tchmins sans dbouts)[1], c' est ene ramexhnêye d' arimés da Félix Duval.

Elle a stî eplaideye e 1973, mins les powinmes, tertos datés, rimontèt a 1953, po les pus vîs.

L' ouve a yeu le pris do Hinnot e 1972.

Egzimpe d' arimé[candjî | candjî l’ côde wiki]

Li powinme ki shût riprind ene sôre di resploe.

El pitite voye
Il aveut creu, a bon
k' il aléve sins djoker
moenner ses pzants talons
tavå les tchmins do monde
On est foirt, a vint ans,
po hagnî dins l' avni.
Eyet come on coreu lancî,
dins l' bas d' on tiene
po Diu, po djin, po diåle,
i n' åreut aresté.
Çou k' i voleut, c' ît viker
tot come on djonne efant
djuglant dins les paxhis,
coyant les fleurs do bos...
Çou k' i voleut, c' ît rire
come on rît e bontins
e mexhnant des clignetes
dins les bleus iys
des feyes.
Il aveut creu, a bon
k' il aléve sins djoker
moenner ses pzants talons
tavå les tchmins do monde !
Portant on djoû, maflé,
E rlevant s' tiesse pesante
ses iys d' efant wasté
waitant dzeu les nouwêyes
ont veu èn pote tchimin
voyete do paradis
ki guignive padlé lu
e lyi criyant « alo ! »
I s’ aléve ertourner
s’ edaler sins rén dire
e s’ dimandant vraiymint
s’ on l’ prindeut po on sot
eyet si on creyeut
k’ il ît ddja tins por lu
di djoker ses rizêyes
yet d’ mete ès cour å stok.
Il aveut creu, a bon
k' il aléve sins djoker
moenner ses pzants talons
tavå les tchmins do monde !
Portant, i n' aveut måy esté
si pzant
eyet si scran !
I rmouwéve divins s' tiesse
des gros monceas d' idêyes
sins ndè poleur trover
ene valåbe;
sins rén comprinde di bon.
Ey ådjourdu,
tot seu
fayé eyet pierdou
lu ki creyeut.a bon
k' il aléve sins djoker
moenner ses pzants talons
tavå les tchmins do monde,
i monte e saetchant s' croes
el voyete di loumire..
Et i s' ritoûne kécfeye
po ratraper s'-n alinne
eyet po stiede ses iys.
C' est k' i s' dit, e lu-minme
k' i sreut asteure å dzeu
s' i n' aveut nén wasté
ses anêyes di djonnesse
po des fayés plaijhis
et dins do tins
pierdou.[2]

Sourdant et pî-note[candjî | candjî l’ côde wiki]

  1. avou disfaflotaedje des apostrofes divintrinnes
  2. sicrît e moes d' måss 1955.