Nosse cok tchante co (tecses)

Èn årtike di Wikipedia.

Nosse coq tchante co

Nosse cok tchante co (Nosse coq tchante co), c' est on live avou des tecses e walon, bråmint des arimés, sicrît pa Albert Delvaux ey eplaidî ås edicions «Le livre en papier» e 2019.

ISBN 978-2-80830573-0.

Contnou[candjî | candjî l’ côde wiki]

Li live est pårti a cwate trepådjes.

Li prumî s’ lome « C’ esteut ayir ». C’ est des ptitès prôzes so les noveles do djoû des anêyes 2000-2010. End a 9, avou co troes arimés.

El deujhinme pårteye, on rtrove les fåve da Lafontinne et da Florian.

Dins les cenes da Lafontinne, end a sacwants k’ on n’ kinoxhe nén foirt, come « Li leu et les bierdjîs » (p. 78). Après ça, end a toplin da Florian, ki n’ avént waire sitî rmetowes e walon, disk’ asteure, todi.

Adon-pwis, des cenes redjårbêyes a pårti di scrijhaedjes da Henri Petrez, Jean de Lathuy u Pierre Lazard.

Mins cial, on a on redjårbaedje bråmint pus libe, ki finixh pa ene longue moråle :

Tant k' al troejhinme pårteye, c’ est des tuzaedjes, afeye del filozofeye, come li boket «Divni vî» (p. 160), pacô di l’ actouwålté, come li lete a Bietmé l’ Texheu (p. 164-166).

El cwatrinme pårteye, on a des fåves-couyonådes.

Bokets[candjî | candjî l’ côde wiki]

del prumire pårteye[candjî | candjî l’ côde wiki]

Si on vout schoûter les djins, Fourniret et Dutroux årént fwait dpus pol reputåcion del Waloneye ki si vos metrîz Djule Destrêye, Djone Cocril et Nesse Solvai eshonne.

del deujhinme pårteye[candjî | candjî l’ côde wiki]

Vleur djouwer å gros sins ls ecus,
C’ est co l’ meyeu moyén d’ fé rire.
Si t’ vous peter pus hôt ki t’ cou,
T’ årès ene brayete sins botnire.
A t’ fé passer po grandiveus
Tot åd dilong di t’ vicåreye,
Ti paiyrès après çk’ est padzeu
L’ seu vraiy bouneur k’ on s’ è rafeye[1]

del troejhinme pårteye[candjî | candjî l’ côde wiki]

Vos n’ sårîz djamåy adviner
Tot çk’ i lzî fåt rén k’ po s’ cwefer
Des bigoudis, des emantcheures
A des pris ki vos n’ sårîz shure.

Djudjmint sol live[candjî | candjî l’ côde wiki]

On n’ si rtrove nén avou des belès istweres des viyaedjes del mitan do 20inme sieke.

Dins l' moråle del fåve del rinne et do boû — li ûtinne di vers cial ådzeu — nosse Bert Delvå mostere ene fele mwaistrijhe do walon. On walon d’ raprindisse, nén trop aloyî a ene metowe coine del Walonreye. Bén seur, li gros del croejhete est namurwesse, mins gn a des mots di l’ Årdene et des cis d’ après Tchålerwè. Do rfondant namurwès, cwè !

Mins on rtrove kécfeye des compôzucions ki n’ sont nén noveles dizo l’ solea. Metans å lére li « Pretchaedje so les comeres d’ ådjourdu », on l’ croereut lére li ci rcopyî pa on lomé De Croyî diviè 1600, ki c’ est l’ tot prumî tecse walon måy ritrové.

Dins les couyonådes del cwatrinmes pårteye, end a des edvintêyes, mins eto des cenes k’ avént ddja stî riscrîtes e walon. Come li spoûle des rôzes et des rododindrons, k’ aveut divnou ene des djôzefreyes da André Henin.[2]

Sourdants[candjî | candjî l’ côde wiki]

  1. moråle d' on long redjårbaedje del fåve «li rinne et l' boû», p. 58.
  2. Lucien Mahin, Li Rantoele l° 92, ivier 2019-2020.