Passêye do djoû des åmes

passêye do djoû des moirts a Annvoye

Li passêyes do djoû des åmes, c' est ene viye uzance del Walonreye la k' on vént, å djoû des åmes, vinde des sacwès di s' corti po payî des messes po les moirts ki n' ont pupont d' famile.

Li vindaedje si fwait a môde di håsse.

Vicansté

E 2006, gn aveut co ene passêye do djoû des åmes a Annvoye et a Soûmwè.

A Soûmwè, l’ uzance deure sins aresse dispu dipus d’ 100 ans.

A Annvoye, l' uzance a rprins lanawaire , après awè aresté sacwants anêyes.

Li cene di Soûmwè a sî filmêye diviè 2003 en ene emission Kè diss.

A Soûmwè, e 2013, gn a yeu 25 atchteus, k’ ont dit so 117 lots metous po vinde. Li passêye a rapoirté 675 €.

A Annvoye, elle rapoirta 200 € (todi e 2013). E 2023, gn aveut ene vintinne di djins. Li håsse a rapoirté 256 uros, dabôrd ki ça n' aveut nén passé les 200 e 2022.

• 
  les prumîs lots sont presses dins l' eglijhe
• 
  Prezintaedje avou l' istorike
• 
  håynaedje d' ene cabuzete
• 
  passaedje d' on peturon; l' atchteuse di dvant erva
• 
  paymint
• 
  faizan come lot

Date

A Annvoye, c’ est l' djoû des åmes, come li vout l’ alaedje.

A Soûmwè, c’ est l’ dimegne ki shût l’ Tossint. L’ uzance deure dispu dipus d’ 100 ans.

Eplaeçmint

li passêye si fwait a l' ouxh, divant l' eglijhe

Li passêye do djoû des moirt si fjheut dins l' cåbaret do viyaedje.

La k' gn a puch di cåbarets, on l' fwait sol tchapistrea (divant l' eglijhe). Oudonbén cråndimint a l' ouxh, çou ki n' est nén todi plaijhant cwand i ploût u k' i shofele fel.