Indicatif prezintrece

L' indicatif prezintrece ou prezint d' indicatif, c' est on tins di l' indicatif ki mostere ene accion k' a åk a vey avou l' tins d' asteure.

Piceures mostrêyes på prezint d' l' indicatif

Li piceure mostrêye pa l' indicatif erirece pout esse :

• on vraiy prezint :

Cwè çki t' fwais ? :: Dji magne (dji mindje).

Eyou ess ? :: Dji so dins l' gåraedje, ki saye di remantchî on mantche di ramon.

• on forveyou prezint :

Cwand dji di blanc, ti dis noer.

Si vos vnoz dmwin, houkîz nos å telefone.

• on passé riviké come on prezint :

Les Almands bombardént : dji cour radmint a l' abri, et kî çki dj' î rtrouve : mi feme ki s' resseréve siconte do vijhén.

• on futeur dedja viké come on prezint :

Est çki t' rexhes al nute ?

Cwè çki nos fjhans dmwin ? î alans dj' u nén, a leu raploû ?

Les Bedjes corèt (cournut) l' 100 metes olimpike mårdi ki vént a 8 eures å matén.

Emantchaedje des codjowas

1ire djin do singulî

Li cåzant (et l' cåzante) si fôme :

• tot rsaetchant l' cawete do viebe :

sketer : dji skete ; magnî : dji magne ; braire : dji brai ; s' ashir : dji m' ashî ; boere : dji boe.

• tot leyant l' infinitif insi :

fini : dji fini ; rexhe : dji rexhe ; bate : dji bate

• tot radjoutant ene cawete å bodje do viebe :

tchicter : dji tchictêye ; mostrer : dji mostere; tcheryî : dji tchereye ; (Lidje) fini : dji finixh.

• tot eployant èn ôte bodje :

aler : dji va ; fé : dji fwai ; voleur : dji vou

2inme djin do singulî

L' atôtchî (et l' atôtheye) ès fôme :

• tot radjoutant S al cogne del prumire djin :

ti sketes, ti t' ripaxhes, ti tchictêyes, ti mosteres, ti vas, ti vous

• sol minme cogne ki l' prumire djin :

ti finixh (Lidje)

• dins ene fråze di dmande sins sudjet, tot radjoutant l' cawete -ss, si l' codjowa finit pa ene voyale :

ti vass taire, al fén !? vouss on vere di bire ? boess ene sacwè ? ass fwin ? wice ess ? (mins : pinses tu ? est çki t' rexhes al nute ? est ç' ki t' vas co a messe ?)

3inme djin do singulî

Li rwaitant (et li rwaitante) si fôme:

• sol minme cogne ki l' prumire djin :

ele magne, i tchictêye, ele mostere, i pixhe, i tchereye, i finixh, i s' ripaxhe, i va.

• tot radjoutant S al cogne del prumire djin :

i finit, i brait, ele s' ashît.

• dins ene fråze di dmande avou l' prono sudjet padrî, tot radjoutant l' lete di beloyance -t, såf si l' codjowa finit pa on « t » :

magne-t i ?, mostere-t ele ? rexhe-t ele co totes les shijhes ? va-t i co a messe ? prind-t ele ses pilures ? (mins : est çk' i vout on vere ossu?)

Djins do pluriyal

Po totes les djins do pluriyal, on s’ sieve do bodje A do viebe.

Dins des ôtes langues

• Indicatif prezintrece e francès
• Indicatif prezintrece e neyerlandès (O.T.T.)