Tapaedje del baguete

Èn årtike di Wikipedia.
(Redjiblé di Radiestezeye)
Kimint tni l' baguete
Kimint avancî avou l' baguete
Aprindaedje al Soce des rcåzeus del Basse Årdene (2003)

Li tapaedje del baguete, c' est l' cweraedje après del poujhåve aiwe tot s' pormoennant sol tchamp avou ene baguete di côrî tinowe dins ses mwins.

Motlî[candjî | candjî l’ côde wiki]

Li ci u l' cene kel sait fé si lome on tapeu d' baguete u ene tapeuse di baguete (ene tapresse di baguete). On dit eto: on cwereu d' sourd, ene cwereuse di sourd u ene cwirresse di sourd.

Pus lådjmint, c' est l' trovaedje d' ene sacwè pa ene manire foû-naturele, lomêye radiestezeye.

Pocwè taper l' baguete?[candjî | candjî l’ côde wiki]

On tape li baguete po saveur wice k' i fåt schaver po fé on pousse dins on tchamp u on corti.

Tecnike[candjî | candjî l’ côde wiki]

Po taper l' baguete, i vos fåt ene fotche di côrî, 30 a 40 cintimetes longue; vos l' tinoz tournêye après vos, les deus mwins so les deus dbouts del fotche, avou les pôces et les påmes des mwins å hôt, et l' gros costé del coxhe padvant. Vos seroz mo foirt les deus corons del fotche. I fåt serer foirt, mins les mwins dimorèt todi al minme plaece. C' est nén zeles ki fwaiynut bodjî l' baguete. C' est l' bwès ki travaye.

Todi avou les doets rtournés et les keutes padzo sor vos, vos avançîz di tos les costés. Vos catournez l' tchamp dins tos les sinses. Cwand l' baguete arive addé l' sourdant, u ene voenne d' aiwe k' est dins tere, ele si toide. On nel såreut ritni. Ele vos pout ttossu bén casser dins les mwins.

Adon, si vos passez sol costé d' on sourd, li baguete va d' cresse disk' a tant ki vs soeyîxhe å dzeu d' l' eplaeçmint d' l' aiwe. Cwand on-z arive djusse sol sourd, li baguete dischind tote seule po mostrer l' plaece.

Li baguete va djus, mins di cresse: l' aiwe est a hintche.

Mins on n' trouve nén a tot côp bon. Gn a des plaeces k' i gn a pont d' aiwe. Pa des côps, on rtoume so des ancyins pousses ristopés. Si on n' trouve pont d' aiwe do prumî côp, i fåt del pacyince. Et todi ricmincî.

Avirer l' parfondeur di l' aiwe[candjî | candjî l’ côde wiki]

Po vey a kibén d' fond ki l' aiwe est, on s' î prind insi. Cwand vs sintoz k' el baguete kimince a bodjî, vos contez les metes po-z ariver å sourd (wice kel baguete bodje li pus). Dipus ki l' aiwe tot près d' tere, dipus ki vos l' sintoz ddja did lon. Mins, si on n' rote pus, minme si on-z est djusse dissu l' sourd, li baguete ni va pus.

Li sôre di baguete[candjî | candjî l’ côde wiki]

On n' wåde nén todi l' minme baguete. Po nd aler cweri après d' l' aiwe, on va å bwès côper fotche di côrî. I fåt k' el bwès soeye co frexh. Avou do setch, ça n' va nén si bén. Al seuve, ça va co mî.

Come bwès, c' est l' noejhtî (côrî) ki va l' mî; mins on pout prinde do frinne u åk come ça.

Aprindaedje[candjî | candjî l’ côde wiki]

Po-z esse tapeu(se) di baguete, i n' fåt waire aprinde: gn a k' rwaitî èn ôte fé, et après, ça doet aler tot seu. Mins c' est on don k' on-z a e s' coir. End a ki plèt sayî del fé tant k' i volnut, mais ki n' î savèt ariver: li baguete ni bodje nén dins leu mwin.

Li tapaedje di baguete eyet l' coir do tapeu[candjî | candjî l’ côde wiki]

Cwand vos avoz cwerou ene eure å long, vos estoz fin hode, edon ? Ça adjixh teribmint sol cour, aprume, po so viyès djins. Cwand on est djonne, on nel sint nén tant.

Esplikêye del syince des tapeus d' baguete[candjî | candjî l’ côde wiki]

S' i fåt serer foirt, et kel baguete doet esse vete, c' est k' avou l' aiwe k' est dins l' fond, ça fwait come do passaedje po on waxhla magnetike. Come on corant electrike.

Ça s' comprind bén k' i gn a åk come do corant puski ça adjixh sol sistinme. C' est foirt hodant pol cour.[1]

Live so on tapeu d' baguete waloncåzant[candjî | candjî l’ côde wiki]

Jean-Philippe Legrand, «Marcel Jeanpierre, sourcier d'Ardenne», on bea gros live cwårtoné e francès, mins avou toplin des fråzes e walon, li lingaedje di tos les djoûs da Marcel Djanpire.

Sourdant[candjî | candjî l’ côde wiki]

Commons
Commons
I gn a so les cmons Wikipedia des imådjes ou fitchîs son a vey avou li tapaedje del baguete .
  1. Lucien Mahin, Bate di dvize al Soce des rcåzeus del Basse Årdene, 25-10-2003 Mwaisse responda ciddé.