Rilomés romantîs e walon

Cwate romantîs del kimince des anêyes 2000: di hintche a droete : Chantal Denis, Lucien Somme, Jean-Pierre Dumont, Lucien Mahin

Les scrijheus d' romans e walon si polnut conter so les doets des deus mwins (Victor George). Paski on n' pout nén conter come romantîs tos les scrijheus e walon k' on fwait del prôze.

Li prumî grand romantî e walon fourit, sins manke, Dieudonné Salme, ki cminça al fén do 19inme sieke.

René Barmarin n' est nén foirt conoxhou, dandjreus pask' i n' a nén fwait on live avou s' roman. C' est parey avou Jules Sottiaux.

Tant k' a Robert Boxus, il a scrît cwate romans, di 1913 a 1949.

Portant, ces troes scrijheus la n' ont nén stî ritnous dins l' grosse antolodjeye da Piron.

Ça fwait ki ci serè l' Djôzef Calozet ki s' dinrè a cnoxhe come li prumî vraiy sicrijheu d' romans e walon, avou "Li bracnî" (1920).

Après l' guere, so Tchålerwè, Henri Van Cutsem enonde on mouvmint ki Léon Mahy, et des ôtes, alèt continouwer.

Mins li grand mwaisse del sôre, ci serè seur li Gusse Laloux, pask' i va amoenner totès tecnikes foirt lon do simpe contaedje d' ene paskeye e prôze.

Bråmint des tecnikes da Laloux vont esse riprinjhe pa Lorint Hendschel, Chantal Denis et Lucien Somme.

Mins, avou Lucyin Mahin eyet Djan-Pire Dumont, ces noveas romantîs la ont ça d' bea : i fwaiynut passer leus spoûles dins on monde la k' on n' djåze nén walon podbon. Et renairer insi li djinre d' on bea côp !