Guere del vatche

Li guere del vatche est l' no dné a ene guere k' a ravaedjî l' Condroz inte 1275 eyet 1278.

Les Lidjwès, Namurwès, Braibantîs et Lussimbordjwès î estént egadjûs, sotnant soeye-t i l' Conte di Nameur, soeye-t l' Prince Eveke di Lidje, leus deus e margaye a cåze d' ene vatche hapêye a Cînè (adon payis d'&nbps;Lidje) et rtrovêye sol fôre d' Andene (adon Conté d' Nameur).

Al fôre d' Andene, e 1275, Gui d' Dampire, conte di Nameur eyet d' Flande, meta so pî on tournoe. On lomé Engoran, payizan d' Djalet, î amoenna li fåmeuse vatche, hapêye a on lomé Rigåd a Cînè. Ci-cial, ricnoxhant li biesse, el dijha å bayî do Condroz; mins come Andene esteut foû di si djuridiccion, i propôza a Engoran di rmete li vatcha la wice k' el aveut hapé et d' end esse cwite; sins cwè i srè apicî cwand i mousrè e Condroz (çou k' i dveut fé po raler e s' måjhone).

Engoran fjha come dit; mins a poenne k' i mete ses pîs e Condroz, les omes do bayî ki l' aconcoistént et k' estént a ç' moumint la dins leus waibes, l' apicît eyet l' pinde a èn åbe.

Li signeur di Gône (Djalet esteut sol signeurreye di Gône) endè fourit foirt mwais, d' ostant pus ki Djhan di Gône voléve divni bayi do Condroz al plaece di Djhan di Haloe. Il organiza ene espedicion, avou les signeurs di Celes eyet Spontin et distrure li tchestea di Haloe. Ossurade, Djihan di Haloe replika, alant bouter l' feu so les teres di Gône. Djihan di Gône dimanda l' aidance do conte di Nameur, Gui d' Dampire, k' egadja dins l' conflit l' Lussimbork (Gui d' Dampire aveut spôzé Izabele do Lussimbork).

Namurwès et Lussimbordjwès fjhît l' sidje di Cînè. Les disfindeus del veye fourît tertos broûlés evike dins l' eglijhe. Termetant, li prince eveke di Lidje, Djihan d' Inguî, evoya les Dinantîs ataker Spontin.

Li guere finixha e 1278, après deus ans de disduts.