Stron-d'-pourcea (meteyo)

Pol discramiaedje des årtikes avou l' mot « stron d' pourcea », loukîz cial.

stoubion so on tchamp d' four

e-n ene wastinne

On stron-d'-pourcea (on dit eto ene damabonde, on toubion, on stoubion), c' est on mouvmint do vint ki toûne so lu-minme a pårti d' tere, et k' epoite dins les airs des ledjirès sacwès k' i gn a al tere (poûssire, såvlon, fistous di strin u d' four).

Esplikêyes des motîs e walon

C' esteut ene curieusté, po nozôtes les efants, di vey les strons-d’-pourcea elever des pougneyes di four calfeye foirt hôt dins les airs.

Skepiaedje

Les damabondes skepeynut les djoûs d' esté cwand i fwait foirt tchôd et k' gn a waire di vint.

I s' fwaiynut purade ådzeu d' ene sitindêye di såvlon, mins pacô eto so ene tere pirixheuse u a pårti do four ki sowe dins les tchamps.

Foice et hôteur

Årvier des toubions tropicås (ciclones des tropikes), ki sont pindous ås nûlêyes, a des cints metes hôt, et k' avnèt avou des timpesses, les strons-d'-pourceas dimeurnut tot près d' tere, et ni sont veyous ki cwand i fwait coe.

I n' montèt ki kékes dijhinnes di mete hôt, e criyant foirt: cint metes.

I n' durèt nén dpus ki sacwants munutes, et ç' côp la, on n' les pout nén mzurer so ene schåle di Beaufort ki dmande on mzurmint å moens dijh munutes å long.

• 
  el Tanzaneye
• 
  e-n Israyel (dezert do Neguev)
• 
  e Braezi