Vias d'mârs´
Veas d' måss
Vias d'mârs´ (Veas d' måss), c' est ene ramexhnêye d' arimés e walon da Émile Gilliard k' a vudî come limero especiå des Cayés walons, e nôvimbe 1961 (lº 9). I gn a vint-ût powinmes dins l' ramexhnêye, ey on motî d' ene pådje al difén.
Corwaitaedje
[candjî | candjî l’ côde wiki]Dins les prumîs powinmes del ramexhnêye, Gilliard critike bråmint les ritches, paski, sorlon lyi, i fwaiynut nén leu pårt del bezogne. I dit k' les « pezants cous » n' fwaiynut nén bon manaedje avou l' sonkenaiwe.[1] Por lyi, c' est l' peupe k' a tot fwait po les ritches, et ç' n' est nén djusse ; i s' met daleure lyi-minme emey li peupe : « tos leûs bias djoûs on l's-a stanç'né avou dès bwagnes èt dès chalés »[2]
Dins sacwants powinmes, c' est come si les ritches serént des biesses et pus des omes :
- s'on p' lèt 'rwaitî paus-è fignèsses
- c'èst pîre qui dès rats dins leûs traus
- is sont-st-achîs dins leûs-ayèsses
- come dès molons dins l'tchau[3]
I gn a minme on pô d' violince dins sacwants bokets :
- l'âréve falu r'satchî lès fourûres
- di leû feume èt l' tchapia-bûse
- dès p'tits monsieûs trop bén r'plin.nis
- quéntfîy qu'on-z-âréve ritrouvé dès-omes[4]
Pol resse, c' est foiravant ene peneuse ramexhnêye : Gilliard î cåze do froed, del pôvurté, del moirt, do cimintire… Il a l' idêye ki tot va todi pus må : « tot toûne à broûs què vous-se qu'on faiye d'ôte qui d' tûser à tot ç' qu'on pièd »[5] I gn a k' dins ene pougnêye di powinmes ki cåznut d' frecanter ene djonne comere k' il est ene miete pus optimisse.