Zhuangzi

Èn årtike di Wikipedia.

Zhuāng Zǐ (pinyin), ou Zhuang Zhou (e chinès 荘子, avou les caracteres al viye môde, ou 庄子, avou les caractere simplifyîs), c' esteut on tuzeu chinwès do 6e sieke divant Dj.-C. C' est lu k' åreut scrît onk des mwaisses lives do dawoyisse, li live k' on lome Zhuangzi eto.

On n' sét si Zhuāng Zǐ a viké podbon. S' apinse li live d' istwere da Sima Qian, i provneut di Meng, a nonne del djaene Mouze (Huang He), ki c' est l' province do Henan enute. On dit k' c' esteut on ptit foncsionåre, ki n' vola nén do posse di prumî minisse kel rwè lî aveut ofri. Tins di s' viyesse, i vikéve come on såvadje ome, emé les ptitès djins.

Li Zhuangzi (li live) e-st onk des scrijhaedjes classikes e chinwès eyet onk des prumîs lives do dawoyisse.

Li Zhuangzi (l' ome) est rwaitî come onk des pus cossecants sujheus da Laozi, ca bén k' sacwants rcwereus pinsèt k' il åreut motoit viké dvant Laozi lu minme.

Li mwaisse atuze da Zhuangzi, c' est li Voye (Dao, (道)), ki les sacwès sujhèt totes seules, cwand c' est k' on n' les disrindje nén. Les djins sont capåbes di s' bouter erî del voye pa çou k' i fjhèt eyet çou k' i djhèt. Li nouk, c' est ki, cwand c' est k' on cåze do monde pol kinoxhe eyet l' situdyî, on l' discôpe d' ene façon k' est leye minme dins l' monde, erî del voye.

Do côp, si ça n' est nén avou l' cåzaedje k' ont sét cnoxhe podbon, kimint pout on comprinde li plaece del djin dins l' monde?

Li response, s' apinse a Zhuangzi, c' est do n' "nén bodjî" (wuwei 無為). Ça n' vout nén dire dimorer a rén ou s' tini erî d' totafwait, mins "fé" tot dmorant dvins l' nateure des sacwès eyet des sakîs. I n' nos fåt pus sondjî a "bodjî l' monde", a sayî del toûrner po l' fé come nos vôréns bén. I gn a rén d' politike la dvins, rén k' a a vey avou l' soce: c' est åk ki nos rwaite tchaeke tot seu.

Dins ene fåvirete do Zhuangzi, Zhuangzi sondje k' il e-st on påvion. Cwand i s' dispiete, i s' dmande si ça n' esteut nén l' påvion ki sondjive k' il esteut Zhuang Zi.