Anne Frank

Èn årtike di Wikipedia.
Potchî a: naiviaedje, cweri

Anne Frank (vina-st å monde li 12 di djun 1929, mora e moes d' måss 1945) fourit ene djonnete djwive almande ki scrijha on djournå discrijhant l' vicaedje d' ene famile djwive vicant mucheye a l' epoke nazeye.

Li tombe da Anne Frank et da s' sour Margot a Bergen-Belsen

Frank vina-st å monde a Francfoirt sol Main, c' esteut l' båshele d' on botikî djwif. E 1933 Anne, avou ses parints eyet si grande sour Margot, si saiwît evoye des nazis ey ariver a Amsterdam. E djulete 1942, la k' les nazis ocupît les Bas Payis, li famile et cwate ôtès djins si catchént dins l' gurni d' l' eterprijhe ki l' pa da Ane î ovréve. Ene cope d' amisses olandès lzî apoirtént a magnî. E moes d' awousse 1944 les nazis discovrît l' catchete eyet mete les cis ki s' î avént catchî dins des camps d' concintråcion. Anne Frank mora a Bergen-Belsen e moes d' måss 1945; on n' kinoxhe nén l' djoû egzak.

Li djournå da sinne a stî trové dins l' catchete vude, k' asteure est on muzêye.

Sol termene k' ele a stî dins l' catchete, Anne Frank sicrijha ses tuzaedjes eyet çou k' ele rissintéve dins s' djournå: si prumî sintimint d' amour, les disputaedjes avou ses parints, li pawe eyet les espwers et les dzirs ont divnou on live.

Li pa Anne, Otto Frank, li seule djin des cis k' estént muchyîs k' a sorviké disk' al fén del guere, fijha-st eplaidî l' djournå da s' båshele e 1947 dizo l' tite Het achterhuis ("Li måjhone did pa drî" e neyerlandès). Il a stî ratourné dins pus d' 50 lingaedjes diferins. Gn ourit eto des adaptaedjes pol teyåte, emey zels on foirt bea redjårbaedje e walon da Paul Bolland, dizo l' tite Li cayé d' Anne Frank.

E 1959 on ndè fjha ezès Estats-Unis on fime dizo l' tite The Diary of Anne Frank ("Li djournå da Anne Frank").