Auguste Vierset
Auguste Vierset (1864-1952) fourit on scrijheu e walon skepyî a Nameur.
E walon, i cmince tot djonne a scrire des powinmes, rashonnés dins "Poésies wallonnes" (1936) et "Tot schoyant l' pronnî" (1941). Tos ses arimeass fourît rmetous eshonne dins "Mes djåbes" (1950).
Adonpwis, vo l' la ki s' assaye a èn ôte djinre, li paskeye: "Les paskeyes da Bietrumé Picård" (1938).
Il a scrît eto des pîces di teyåte : å cmince tins k' il esteut ki dmoréve a Sint-Houbert, des sinnetes avou l' accint do Bork, k' i fjha djouwer laddé minme :
- "Parache et Mimile" (1886)
- "Ene dimande e mariaedje" (1887), ene ouve motoit scrîte avou l' coplaedje da Paul Marchot, kel mete eto dins s' bibiografeye.
I ratake, ci côp ci, avou l' accint d' Nameur : "Li côp d' mwin da Tchantchès" (1891); "Li feye Matî" (1898), "Fleur di meskene" (1936), "Li miråke" (1937), "Li Noyé da Polite" (1941).
Il a eto ratourné e walon des pîces do scrijheu d' teyåte flamind Auguste Hendricke: "Prima Dona" et "Pierot vike co"; i rashia do francès "Amon les vîs", da M. Colruyt.
Li Gusse Vierset a bouté, avou, come ricwereu sol walon, et onk des prumîs a-z aprinde ås scrijheus namurwès comint discôper ene fråze e walon dins "Essai d'orthographe wallonne" (1885).
E 1887, il eplaide "Germain-Walon", la k' i djåze des rapoirts inte les lingaedjes tîxhons eyet l' walon.
I divna eto on corwaiteu des scrijheus d' belès letes e walon avou "Poètes Namurois" (1888).
Droldimint, Auguste Vierset n' est nén rprins dins l' grosse antolodjeye da Piron, motoit pask' il eploye cobén des mots et des ratourneures foû do walon d' Nameur, et aveur li dår di scrire des cråmignons, ene compôzucion pår lidjwesse.
Il a scrît eto e francès des contes-rindous d' voyaedjes, des ratournaedjes di l' inglès, des studias so des scrijheus bedjes, so l' istwere, des arimeas, des romans et des pîces di teyåte.
Di s' mestî il esteut professeu d' escole mweyene a Wåve et Sint-Houbert, pu gaztî et mwaisse aidant do mayeur di Lidje.
