Gliese 581 c

Èn årtike di Wikipedia.

Gliese 581-c est ene bole k' est foû do sistinme solrece et ki toûne åtoû d' ene rodje ninte lomêye Gliese 581, a 20,40 annêyes loumires di nosse solea. Il avize ki Gliese 581-c si trouve lon assez eyet près assez di s' sitoele pol veye sikepyî: li timperateure sol daegne (inte 0 °C eyet 40 °C) pôreut esse comufåt po k' i gn åye del corante aiwe.

Gliese 581-c pôreut esse li prumire bole k' on discouve del minme sôre kel tere. Elle est eto ene des pus ptitès boles discovrowes disk' asteure. Si lårdjeu, cårculêye d' après s' masse, est 50 åcint pus grande kel cene del tere. Elle est cénk côps pus massive. Do côp, li gravité sol daegne sereut a pô près 2,15 côps l' cene del tere. Ça s' pôreut ki Gliese 581-c mostere tofer li minme costé a si stoele et ki, do côp, ene dimêye bole soeye tofer el loumire (eyet foirt tchôde) eyet l' ôte tofer el noerixheu (eyet foirt froede). Minme insi, a l' aschate des deus dmêyès boles, i pôreut gn aveur ene sitroete roye amishtåve pol veye.

Li bole a stî discovrowe pa ene ekipe uropeyinne. L' ekipe s' a siervou po çoula d' on telescope 3,6 metes lådje metou e Tchili et del tecnike del roedeu radiåle (on sét cårculer li grandeu eyet l' pwèd, u masse, d' ene bole pask' ele diswaibeye ene miete li gravité di s' sitoele tot toûrnant åtoû).