A ! l' djeu d' bale (tchanson)

Èn årtike di Wikipedia.
Sauter à la navigation Sauter à la recherche

A ! l' djeu d' bale (k' el prumî tite est kécfeye "al djeu d' bale"[1]), c' est ene rilomêye tchanson e walon tchantêye pa Bob Dechamps.

C' est André Hancre k' a scrît les paroles.

C' est eto on tecse di documintåcion so l' motlî do djeu d' bale.

Tecse e rfondou[candjî | candjî l' côde wiki]

A ! l' djeu d' bale !
Dji n' esteu nén pus hôt k' troes pemes (pomes)
Ki dj' esteu ddja sol balodrome
Cwand dji veyeu taper les grands,
Dji sinteu bate èm cour d' efant,
Ça n' esplike nén, ces afwaires la;
C' est ene sacwè ki vos prind la.
C' est dabôrd on tchok electrike,
Et avou l' tins, ça dvént cronike.

Respleu :

Al taxhlete, al basse mwin, å talon
A ! le djeu d' bale ! A ! le djeu d' bale !
Å ptit bresse, al volêye et å rbond,
A ! le djeu d' bale ! C' est tote èm passion
Cwand dj' a trové on want a m' mwin,
Dji n' a nén ratindou lontins
E dadaye, dj' a stî fé el tchet (tchat)
Et tos les djoûs, dji rmeteu ça.
Å leu di studyî mes luçons
Dji ndaléve et vudî l' talon.
Sketé, dji rintreu al swerêye
Po ramassî ene digrincêye.

å respleu

Dj' a grandi, dj' a divnou stocaesse
Dins l' prumire ekipe, dj' a yeu m' plaece.
Dj' a cnoxhou tos les bons moumints
K' dj' aveu revé, estant gamén.
Ls aplodixhmints, les copes, les fleurs
Les sopoirters et les oneurs.
Gn aveut minme dipus d' ene djonnete
Ki, e passant, m' f(ijh)eut des clignetes.
La des anêyes, sovint dji pinse
Ki dj' a wangnî mes dierins cwénze.
Ça n' vout nén dire ki dj' a trayi
Tot çki dj' a veyou et veu voltî.
Dji so toplin d' admiråcion
Po Leyon Cassart, el tchampion.
Et tant k' mes djambes poitront m' carcasse,
A totes les lûtes, dji srè sol plaece.

Dierin respleu :

Al taxhlete, al basse mwin, å talon
A ! le djeu d' bale ! A ! le djeu d' bale !
Å ptit bresse, al volêye et å rbond,
A ! le djeu d' bale ! C' est tote èm passion
Al taxhlete, al basse mwin, å talon
A ! le djeu d' bale ! A ! le djeu d' bale !
Å ptit bresse, al volêye et å rbond,
A ! le djeu d' bale ! C' est on djeu walon.

Pî-note[candjî | candjî l' côde wiki]

  1. coinrece do Roman payis po "å djeu d' bale".