Alexis Bastin

Pol discramiaedje des årtikes avou l' mot « waloneus ki s' lomèt «Bastin» », loukîz cial.

Alexis Bastin

Skepiaedje	16 di djanvî 1894
Moirt	1962
Nåcionålité	Bedje
Activités	scrijheu

WIKIDATA

Alexis Bastin, c' esteut-st on scrijheu e walon do payis d' Vervî.

Il a skepyî a Solwåster li 16 di djanvî 1894. I mora e 1962.

Il a moussî el SLLW e 1945.

Di s' mestî, il esteut directeur d' èn ovroe d' linne (La Lainière de l'Est).

Biyografeye

A studyî a Dolhin, pu al sicole normåle di Vervî.

Il a yeu ene medaye al guere di 14.

Ouve pol walon

Il a cmincî a scrire e walon e 1944, des pîces di teyåte, pu des arimés; et sacwantès prôzes.

End a rashonné sacwants dins «Foyes di tchinne et Fleurs di brouyire» (Fâyes du Tchêne èt Fleûrs du Brouwîre), eplaidî e 1950.

Les pîces di teyåte k' il a scrît.

• Li ci ki mankéve (pîce e-n èn ake k' a wangnî l' Pris Hurard e 1946)
• Li purêye coxhe (pîce e troes akes, 3inme pris el bate SLLW e ?)
• Edon Zefirin ? (e troes akes)
• Å cir (èn ake).

Egzimpe di boket

Mi walon d' Solwåster

Li tins court rade evoye ; portant, dj’ a co sovnance
Di cwand dj’ esteu tot djonne et ki dj’ tchoûléve e m’ banse ;
Mi mere, po m’ apåjhter, mi djåzéve e walon.
Et cwand dj' sereu minme ouy å diåle et co pus lon,
Do walon d' Solwåster, a l’ boke, dj’ åreu co l’ gosse,
Paski ci walon la, edon mere, c’ esteut l’ vosse.

Pere, cwand dju rtuze a vos, dji rveu vosse bon vizaedje,
Et so l’ côp, dju vs arinne e patwès d’ nosse viyaedje ;
Et cwand dji dvreu viker cint-z ans, et co pus vî,
Li walon d’ Solwåster, dji n’ el såreu rovyî,
Paski ci walon la, edon pere, c’ esteut l’ vosse.

Pus tård, adlé vos deus, dji dirè : « C’ esteut l’ nosse ».

Hårdêye difoûtrinne

• Vos trouvroz des racsegnes so les ouves da Alexis Bastin, u les ouves zeles-minmes, sol Wikisourd e walon.
• Sacwants scrijhaedjes (so l' Aberteke)