Cantåte lidjwesse prezintêye å Prince li djoû di si eleccion
Li Cantåte lidjwesse prezintêye å Prince li djoû di si eleccion, c' est ene cantåte sicrîte pa Simon de Harlez li djoû ki Tchåle Doutrumont fourit lomé prince-eveke di Lidje (li 20 d' avri 1763).
Incipite: Binamé Diè, ké rmowe-manaedje
Elle est rprinjhe sol limero 26 dins l' invintåre Piron.
Papîscrît et replaidaedjes
[candjî | candjî l’ côde wiki]Li mwaisse copeye est wårdêye al bibioteke cintråle del veye di Lidje, Antiquariat, 18inme sieke, l° 59.
Elle a stî replaideye e sistinme Feller dins l' coleccion «Disfinse et metaedje e valeur do lingaedje do Payis d' Lidje», e 1981, dins on limero lomé «cougnou».
Tecse e rfondou
[candjî | candjî l’ côde wiki]- Keur des bordjoes
- Binamé Diè ! Ké rmowe-manaedje!
- Ké djoye so tertos les vizaedjes
- On-z ôt rôler les cariyons
- Peter les tchambes, hoûler l' canon
- Xhiyetes et clokes sounèt-st a foice; (a fwèce)
- Les mårlîs ont trop pô d' leus bresses;
- Boum boum pif pouf ! Diè ! Ké disdut !
- On creye on brait, on dåre tot djus.
- Les cmeres
- Kén awureus djoû pol bordjoezreye !
- On-z a on prince di nosse payis
- Les cis ki l' ont fwait fjhît des merveyes.
- Nos cours l' avént dedja tchoezi
- Les vîs bounames
- Nos avans sohaitî cint feyes
- Di poleur viker disca tant
- K' on åye èn eveke ôte feye
- Nos morrans contins; nos l' veyans.
- Li keur (riprindant)
- Binamé Diè ! Ké rmowe-manaedje
- Ké djoye so tertos les vizaedjes
- On-z ôt rôler les cariyons
- Peter les tchambes, hoûler l' canon
- Xhiyetes et clokes sounèt-st a foice; (a fwèce)
- Les mårlîs ont trop pô d' leus bresses;
- Boum boum pif pouf ! Diè ! Ké disdut !
- On creye on brait, on dåre tot djus.
- (Cåzé) Djuråd l' mådjineu
- Taijhoz vs on pô, vos, diåles volants!
- Schoûtez troes mots ki dj' a-st a dire:
- Dispoy eco cint et cint-z ans,
- Ci djoû cial esteut scrît e cir;
- Matî Lansber el saveut bén;
- Et vocial come i nos l' aprind:
- Prediccion Matî Lansber (tchanté)
- Redjouwixhance avå l' Hesbaye !
- Pos-å-feu e totes les måjhons;
- Des bots broûlés, tot come del paye
- Tot Lidje est djoye; grands bruts d' canon
- Ilusse famile bén rcompinsêye
- D' aveur todi sotnou l' payis
- Li crosse et l' mite lyi seront dnêyes
- Divins l' crexhant del lune d' avri.
- (cåzé) Bietmé l' sûti
- Vost årmonak, pol prumire feye
- Motoit, nos a dit l' verité.
- Mins sins planete, ni sôrcelreye,
- Por mi, dj' åreu bén adviné
- Ki d' Outrumont divénreut prince.
- I n' est k' çou k' il a merité.
- Tolmonde el dit, tolmonde el pinse;
- Cwand on sait çou k' ses vîs parints
- Et totes les binamêyès djins
- Ki sont sôrtis d' ene si boune raece
- Ont fwait pol payis di tot tins.
- Çoula dveut esse tot come i s' passe
- Et nos cours l' ont dit pus clairmint
- Ki d' l' aler lére divins les asses.
…