Clément Adam

Clément Adam, c' est on scrijheu e walon di Binne.

Ses tecses fourît eplaidîs dins «Nosse lingaedje», li Bultén walon, et dins l' coirnêye e walon di des ptitès gazetes d' Årdene.

Egzimpe di tecse

Vocial li redjårbaedje d' on biyet d' oumeur filozofike, so les vîs djoûs.

Ni soeye nén ene ehale po t' barnaedje

Ni soeye nén caegnaesse ni vireus; wåde tu d' fé ene gueuye come ene dimeye samwinne.

Inte li calinreye et l' tinrûlisté des viyès djins, tchoezi puvite li tinrûlisté, mins waite di passer a costé des deus.

Ni soeye nén todi a rén; l' ovraedje nåjhixh li djonnesse, mins wåde li viyesse.

Ni soeye nén pice-crosse; i n' a nole potche e-n on waxhea, et tes efants seront capåbes di saetchî leu plan sins twè, nel roveye nén.

Ni djåze nén tant d' tes mehins et d' tes maladeyes : ti serès ddja a mitan rweri.

N' endè va nén panea drî panea dvant, minme si t' es tot seu. Po-z ataker, on roveye di fé s' båbe; adonpwis, on roveye di rabotner s' cou-d'-tchåsse; wice k' a on moirt, on lait l' ouxh å lådje.

Ni djåze nén todi di t' tins : i n' esteut seur ni meyeu, ni pus måva ki l' ci d' asteure.

Divant d' djudjî les djonnes, tuze a çou k' t' as fwait, twè !

Si ti fwais on pleu e t' vinte (redjime) ou k' ti potches houte del tåve (si t' n' as pus fwin), tuze ås cis k' ont des dints come les ôtes.

Aveur manké l' educåcion d' tes efants n' est nén ene råjhon di voleur fé l' cene di tes ptits-efants.

Soeye plaijhant si ti pous, mins n' cwir nén a fé l' mårticot. N' a rén d' pus trisse k' on vî gugusse; nel soeye nén !

Tuze ås femes si ti vous ou si ti pous, mins ni soeye nén on potche-so-totes.

N' åye nén sogne del moirt. Tuze-z î; ça vénrè a s' tins. Mins ni di nén a tot côp : dji n' voerè pus çoula.

Si ti croes, tuze a ti åme; si ti n' croes nén, tuze-z î tolminme.