Corante aiwe

Corante aiwe

Ene corante aiwe, c' est ene aiwe ki court.

Ene tote Adon, ça cmince pa les pixhlotes ou filets d' aiwe, pu les ris (rixheas, rixhots, rew, ruwåd), pu les mouzes (fleuves), ey eto les tchenås, bîs d' raiwaedjes, derivåcions, end..

Les pus grosses sont naiviåves (on pout naivyî dsu avou des naçales (barketes) u des pus gros bateas.

Ene corante aiwe est diferinne d' ene cropante aiwe (laks naturels, astantchêyes, vevîs fagnes, marasses).

Coraedje

Ene corante aiwe kimince a on sourdant. Ele groxhit, et rçure des pus ptits rixheas ki s' î vnèt agoliner. Ele pout leye-minme si taper dins ene pus grosse aiwe, ki pout esse on mouze. On mouze (fleuve) s' egole todi dins ene mer u èn oceyan.

So castinne, les corantès aiwes polèt moussî e tere et disparexhe dins des trôs (trô d' Belvå), ou des tchantoeres ou egolinas ou edujhoes ou pousse.

Livea

Ene corante aiwe pout esse a setch ene pårteye di l' anêye (c' est todi l' cas des ouwetes. Sins ariver a setch, les corantès aiwes ditoumèt (baxhnut) e l' esté et boutèt (sont grosses) e l' ivier, copurade å rlén.

Vås

Ene corante aiwe naturele a ene sitindêye di teres ki totes les pus ptitès corantès aiwes î agolinèt : c' est les vås d' ene aiwe u bassin.

Plaeces a pårt dins ene corante aiwe

on leyisse

• leyisse u neyisse : la k' l' aiwe toûne so leye-minme, et ramoenner les flotantès sacwès todi al minme plaece.
• gofe : la ki l' lét d' l' aiwe est bråmint pus fond k' a costé.
• boird u erive (avou, kécfeye, des perets.