Dji m' lome Meliye... (paskeyes)

Dji m' lome Mèliye…

Coviete

Dji m' lome Mèliye... (rfondou e « Dji m' lome Meliye... » eyet tradût e francès : « Je m'appelle Mélanie... »), c' est on roman da Jean Goffart. Mins il est basti come ene shûte di paskeyes po rire.

Li live est scrît e rfondant walon carolo. C' est Lucyin Mahin k' esplike tote ciste ovraedje la dins li dvant-z-ouve et les rawetes.

Il a rexhou li 10 di setimbe 2009 des Eplaidreyes Embanner. C' est li l° 4 del Pitite coleccion Belès Letes del Rantoele.

Il a stî saetchî a 1050 egzimplaires, çou k' endè fwait l' pus hôt tiraedje des lives avou les tecnikes do rfondou walon.

ISBN 978-2-914855-65-5

Contnou

C' est totes des kéntes k' arivnut a l' eroyene, ki s' lome Meliye, come di djusse, et k' est infirmire. Ça rshonne ene miete, a môde di prôze, al binde d' imådjes Gaston Libiestreye. I s' berôle dins l' ôre cronolodjike. I cmince cwand l' mwaisse persounaedje esteut co gamene.

Tot rwaitant l' fôme do live, on lét l' tecse e walon a gåtche avou s' ratournaedje francès a droete. Li live est scrît e rfondant carolo. Ça vout dire k' i gn a des piceures do patwès di Tchålerwè avou sacwants elemints do rfondou ddins. L' oteur dit foû cwand il inme ostant uzer les piceures do carolo ubén les cis do rfondou.

Aidance

Li live est enimådjî avou des dessinaedjes da Jean Raes. L' adrovaedje est scrît pa André Gauditiaubois. Gn a-st eto on cloyaedje da Yannick Bauthière ki mostere li pouna et l' cova del tchuze do scrijha e rfondou. On-z ertrove eto les divant-z-ouves eyet les rawetes da Lucyin Mahin.

Corwaitaedje tecnike

Tite

On åreut dvou mete purade «On m' lome Meliye» po rescontrer ene dujhance classike des walon-cåzants di n' si nén fé valeur, tot djhant «mi», «dji».

Djeus d' mots

Mon Diu, cwè çk' elle a yeu come savon ! Dji pou minme vos dire k' i n' a nén siervou po … prinde ès bin dins l' fameuse bagnwere.

Tot djåzant d' on djinecoloke :

! Èç-n ome la, on lyi a dné on no e walon, alèz sawè pocwè ! On l' a lomè « dji n' é co l' loke ». Ba, c' est ptete paski cwand l' efant vént å monde, i n' a co pont d' lokes dissur lu.

C' esteut des masseurs ki vnént e droete lene di Holande (come les zwites el djoû do Noyé).

Ôtès rireyes

Gn a minme ene miete di scatolodjeye, mins sicrîte polimint.

Dji cacheu tot simplèmint après m' paket d' moutchwès è papî, paski dj' aveu l' gote å nez. Nonfét, dji n' aveu nén èto l' crote å …

Vindince

Tecse po les gaztîs :

Ké paskeye, les cousses, di voleur adiercî on sfwait côp. Li scrijheu sereut i ene miete berzinke ? Azår k' i rsaetche bråmint di s'-n eroyene, Meliye. Mins, c' est aprume po fé rtrover åzès lijheus li plaijhi d' awè do walon divant leus iys. Li walon ! li vî lingaedje di nos tayons, ene miete rovyî asteure.

Li roman est scrît e "rfondant carolo". I n' est nén reki di candjî vosse prononçaedje po ça: tchaeconk pout lére "Meliye" tot hôt et prononcî ès walon come dins s' viyaedje. L' idêye, c' est di n' pus awè ditrop di scrijhaedjes diferins pol minme tecse, k' on pôreut lére "di Nivele a Måmdey", apinse å Vervîtwès carolo k' esteut Adlin Grignard.

Ci live la, c' est trinte anêyes del vicåreye di cisse barbuzete la d' Meliye, k' end a cnoxhou des kéntes, et des kéntes au rvier. Tertotes po vs fé boere ene pinte di bon sonk.