Gaston de Gerlache de Gomery

[WA] Gaston di Djerlaxhe di Gomri

Plake å meur avou ses racsegnes, metans ses dates di nexhance eyet d' morance. Padzo, il est scrît deus sacwès. Li prumire, c' est avou li fwait k' il a stî e-n Antartike. Li deujhinme, c' est po mostrer k' il a stî borguimwaisse di Wullem.

Gaston de Gerlache de Gomery, c’ esteut on baron. Il a nexhou li 17 di nôvimbe 1919, a Brussele. Il a morou li 13 di djulete 2006, a Oudenaarde. C’ est l’ fi d’ Adrien de Gerlache de Gomery. Ci-ci, c’ esteut li prumire djin a fé ene espedicion e l’ Antartike. Ça s’ a passé e 1898, sol batea lomé « Belgica ».

Espedicion e-n Antartike

Gaston de Gerlache de Gomery est foiravant cnoxhou po-z awè riprezinté l’ Beldjike, pindant 17 moes, åzès boutaedjes di l’ Anêye Djeyofizike Eternåcionåle. L’ adierça, c’ ît d’ bate carasse les novelès teres di l’ Antartike. Ces teres la estént målåjheyes a rlever, veyanmint k’ ci continint ci est si télmint grand. Cist ovraedje la a permetou d’ basti des ponts d’ ravitaymint. La eto k’ il a acdiné d’ erwaitî des sacwès stratedjikes po les avnantès ekipes.

C’ est Gaston de Gerlache de Gomery k’ a moenné l’ espedicion bedje. Tot çoula, après aveur sitî pilote-di-tchesse al Royal Air Force, k' est l’ armêye di l’ air burtaenike. On-z aveut prindou deus bateas norvedjins avou 17 omes, li pus sovint des sincieus, eyet l’ ustireye po lz amoenner drola. On-z aveut tcherdjî 440 tones di tote l’ ustireye, kipårtî e 2.350 boesses. Houte di çoula, i gn aveut 850 contneu d’ mazoute, troes éndjins halenreces ey èn elicoptere. Les bateas avént pårti d’ Anverse, li 12 di nôvimbe 1957.

Gaston de Gerlache de Gomery aveut rivnou el Beldjike, li 2 d' avri 1959. C' est 25.000 sakîs k' avént dalé disk' a Ostinde po-z ascoyî l' espedicion avou on batea norvedjin : li Polarhav. Ci no prôpe vout dire « pôrt polaire », e norvedjin. Dins l' astoke, on-z aveut ritrové 54 boesses di documints, di notes eyet d' årtchives sincieuses so l' Antartike. Bådwin I d' Beldjike, Tchåle di Lussimbork ont monté, avou leus familes, sol batea. Cwand tertot a dischindou, les esploreus ont rçuvou on rindaedje bon dvwer d' ene troke del Foice Navåle. Deus rçuvinnes oficires elz atindént : ene på Veye d' Ostinde ey ene å Palå provinciå di Brudje.