Ghislaine Gaussin

Ghislaine Gaussin, c' est ene sicrijheuse e walon ki provneut d' Ôlwè. Elle a dandjreus vnou å monde dins les anêyes 1910 et mori dins les anêyes 1980.

Elle a dmoré lontins a Fumwè.

Elle esteut Relîte namurwesse.

Elle sicrijheut des arimés.

Si a-t ele sicrît bråmint dins les Cayés Walons, di 1963 a 1985. Elle a eto stî eplaideye dins "Ardenne Wallonne".

Onk di ses scrijhaedjes

C' est èn arimé ki cåze del tchapele Sint-Rok do Bati a Fumwè.

Plaece do Bati

Avou ses gros tiyoûs k' ont pus d' on côp cint ans,

Avou s' tchapele Sint-Rok et avou ses vîs bancs,

Elle a dmoré por mi ene des doûcès sovnances...

K' ont fwait les pus beas djoûs d' ene binamêye efance...

L' esté, et ås condjîs, cwand i fjheut do solea,

On pleut vey les båsheles, roslantes dizo l' tchapea,

Ashides so on ployant et keudant des dinteles

So des dzeus di tchminêye, des tîkes ou des draps d' toele.

E preparant l' trousso, on cåzéve do galant,

Et l' cene k' end aveut pont, schoûtéve e s' dimandant

Si ç' n' esteut nén l' moumint di cori a l' tchapele,

Rabressî l' clå so l' ouxh ou broûler ene tchandele,

Po trover dins l' anêye, on valet å bråve cour

Et k' åreut tot çk' i fåt po basti l' vraiy bouneur...

On î woeyive ossu, deus côps l' an, al dicåce;

On danséve co l' cwadrile; cwand arivéve li pôze,

Les djonnès djins zouplént tertos dsu les tchvås d' bos,

Les beles drî leus galants, les rserant on pô dtrop.

C' est å "Djårdén d' Esté" k' on boeveut e famile,

Et pu, ene miete pus lon, on pleut djouwer ås gueyes;

On djouwéve po l' plaijhi, mins ossu po l' djambon,

Ki, flori d' ene cocåde, ratindeut el tchampion.

Ttaleure, prumî a l' baye, tot djusse padvant l' muzike,

I dischindront Fumwè å minme pas ki l' djimnike...

Li Bati, ces djoûs la, aveut èn ôte vizaedje,

Il esteut come neyî dins l' brut et dins l' dalaedje.

Mins l' londmwin, dins l' tinresse d' on doré åmatén,

On î etindeut messe po tos les trepassés...

Dj' a ristî so l' Bati, dj' a rveu li ptite tchapele,

Mins dj' n' a pus veu d' båshele î broûler ene tchandele.

foû di "Ardenne Wallonne" l° 8, moes d' djun 1977.

Djivêye di ses scrijhaedjes dins les "Cayés walons"

• "Boune anêye", 1967 (1), 22.
• "Moman", 1967 (7), 161.
• "Soçons d' Mouze", 1973 (5), 71; riprins e 1982 (7), 113.
• "Li Bouneur", 1973 (10) 154.
• "Ci n' est nén si aujhey", 1974 (1), 11.
• "Hommage à Jules Rivière", 1974 (3), 47.
• "L' Aviedje des Schayteus", 1975 (1), 4.
• "Dji vôreu co ...", 1975 (5), 82; riprins e 1977 (10), 155 ey e 1985 (1), 12.
• "Por mi ...", 1976 (9), 142.
• "Sovnances", 1977 (8), 124.
• "Grand-meres", 1977 (10), 156.
• "On reve", 1977 (10), 157.
• "Rôze di Noyé", 1977 (10), 157.
• "Pinsêyes po ene moman trop rade evoye", 1978 (7), 117; riprins e 1983 (2) 30.
• "A no curé...", 1979 (2), 32.
• "Li plaece do Bati a l' esté", 1979 (2), 40.
• "Bijhe", 1980 (1), 6; riprins e 1982 (7), 113.
• "El madame al blanke tiesse", 1981 (3), 38. 

Hårdêye difoûtrinne

Mwaisse modêye et ratournaedje e francès di l' arimé cial å dzeu