Hodrémont

Èn årtike di Wikipedia.
Sauter à la navigation Sauter à la recherche

Hodrémont (so plaece Odrémont, fr: Houdremont) c' est èn ancyin ptit ban del Walonreye, rebané avou Djedene.

  • Vîs scrijhas: Holderus mons (Mont d' Huldéric), Hodreimont (XIV°s.), Houdrémont (1472), Hodrimont (1580), Hodrémont (1571-1598).
  • Dimanants: 228 (1830), 303 (1910), 285 (1930)
  • Eglijhe: prumî odjivå (1890-91) broûlêye e 1945 (ribasteye après l' guere)
  • Patron: Sint Quirin.
  • Dicåce: al Pintcosse.

Istwere[candjî | candjî l' côde wiki]

E moes d' decimbe 882, les moennes di Ståvleu, ki vnént d' Djivet et eralént a Ståvleu avou l' coir di Sint Quirin, ont laixhî ene rilike a Hodrémont. Nosse Sint a divnou adon li patron del pårotche.

Al fén do XVII° s., Orcîmont a stî rataetchî kéke tins al France, çou k' a amoenné kékes familes a pårti s' astaler dins l' bwès des Hayes, nén lon des Vîs-Moléns.

E 1706, li rwè Tchåle III lezî a acoirdé ene tchapele, avou Sint Antoenne di Padouwe come patron. Ça a stî, sol payis, li cmince del veneråcion a Sint Antoenne. On perlinaedje a don demaré ås Vîs-Moléns, mins après l' Traité des Limites di 1769, les djins des Hôts Butés, k' avént aidî a basti l' tchapele, ont obtinou do Rwè d' awè l' tchapele a leu viyaedje. Çou k' a stî acoirdé e 1778. Les perlinaedjes ont alors wangnî les Hôts-Butés, deus kilometes pus lon. Ci perlinaedje la do 13 di djun est co foirt rilomé asteure des deus costés del frontire et deure deus a troes djoûs.

Li perlinaedje des Vîs-Moléns estant ddja foirt frecanté a l' epoke, li Rwè aveut permis, pa octroyaedje do 18 di setimbe 1709, d' î stabli troes fôres l' an: li prumire, li 30 d' avri, li deujhinme, li 14 di djun et li troejhinme, li 30 di setimbe. Elle ont duré la djusk' e 1747, pwis ont stî ramoennêyes a Hodrémont.

E 1830, a Hodrémont, sol Bati, gn aveut 4 fôres so l' anêye: li 4 di may, li 14 di djun, li 5 d' awousse et l' 30 di setimbe. Co foirt frecantêyes divant 1914, elle ont baxhî et ont divnou des fôres ås pouchlets, djusk' al guere di 1940.

Li viyaedje fourit broûlé des Almands li 23 d' awousse 1914, tins del guere 1914-1918.

Tins del guere 1940-1945, il est rbroûlé pa des SS k' estént a Bive, cor on 23 d' awousse, e 1944, eyet distrure li rezistance k' i gn aveut.

Li djoû del Sint Antoenne 1944, li makis francès des Manizes a stî ataké pås SS di Charleville. 107 djonnes djins di Rvin ont stî touwés å combat u martirijhîs dins les bwès des Hôts Butés. Ene ceremoneye d' omadje les î est rindowe li djoû minme do perlinaedje a Hodrémont.

Tuzance walone[candjî | candjî l' côde wiki]

  • Accint do walon e 20inme sieke : Les doûcès consounes å coron ni s' prononcént nén adureyes : ene gade si prononcive èn gad (nén gat, come cåzu totavå l' Walonreye).