Isi Steinweg
| Skepiaedje | 11 d' avri 1881, Lidje |
|---|---|
| Moirt | 1975 |
| Activités | scrijheu |
Isi Steinweg (di s' vraiy no: Isidore Steinweg), c' esteut on conteu d' fåves ey on scrijheu d' pîces di teyåte et d' tchansons e walon, do payis d' Lidje.
Il a nexhou li 11 d' avri 1881[1] et il a morou e 1975[2].
Mwaissès dnêyes
[candjî | candjî l’ côde wiki]I scrijha di l' eter-deus-gueres.
Il a-st eplaidî dipus d' 100 tchansons foirt kinoxhowes.
Dins s' mwaisse pîce, «È Payis Neûr», i mostere k' il a ene boune kinoxhance do mestî des hoyeus.
Il a stî eto directeur del “Måjhon Halleux”, ki vindént des pîces di teyåte et les ahesses po les dramatikes.
Isi Steinweg est cité dins l' live da Émile Lempereur so les scrijheus d' pîces di teyåte.
Sacwantès pîces di teyåte sicrîtes pa Isi Steinweg
[candjî | candjî l’ côde wiki]- Pîce e-n èn ake.
- On côp d' ouy so sinte Mågrite (sketch).
- Pîces e deus akes.
- Di kî djåze-t on ? (vådveye).
- Nos avans l' oto (comedeye).
- Pice e troes akes.
- Po l' oneur et pol patreye.
- E Payis Noer.
Arimé
[candjî | candjî l’ côde wiki]Ti doimes, fré walon !
Dispiete tu, fré walon ; l’ oraedje hoûle a nosse poite.
Est çk’ e fén fond di ti åme, ti firté sereut moite ?
Vass leyî mete ene bråye a t’ vigreus cok hardi?
Et ti amour di t’ patreye, est i moirt po todi ?
Ti vass leyî moenner tot parey k’ èn esclåve ?
Et l’ tere del Walonreye est ele divnowe haeyåve ?
Vass Ieyî l’ etrinjir ti sprotchî dzo s’ talon
Et fé ene province flaminde di t’ bea payis walon ?
Si c’ est insi, Walon, ti n’ as k’ çou k’ ti merites
Puski ti vous viker tot parey k’ èn ermite,
Foirdjeye twè-minme les tchinnes ki t’ divèt-st elaxhî !
Ti n’ as k’ çou ki t’ rivént ; ti n’ est k’ on crotalî !
T’ as råjhon, fré walon, rispoize tu, doime e påye
Wåde ti bele confiyince... dimwin, fårè k’ t’ el payes
Rispoize tu, fré walon....Les lawris k’ t’ as ctapé
K’ å pris d’ leu meyeu sonk, tes peres avént côpé,
Dimwin, seront hinés tot a fond d’ ene bassene
Et pouriront motoit come on hopea d’ ansene.
Dimwin, divins l’ banslete ou l’ saetch d’ on clicotî,
On mètrè les banires di tes trinte-deus mestîs.
Dimwin, dvins les eglijhes, ti schoûtrès souner l’ transe
Di totes tes libertés et come di ti indepindance.
Dimwin, li måle aweure irè poirter bén lon
K’ c’ est fini di t’ patreye, k’ i n’ a pus des Walons.
Dimwin, ti fir peron, riviersé par des traites
Rispoizrè po todi e fén parfond d’ ene aite.
T’ as rovyî tes rvinteus come tes Frantchimontwès
Et ti n’ vås nén les poennes k’ on s’ ocupe minme di twè.
Mins, ki voe dj’ ? A tes ouys, sourdèt deus grossès låmes;
Et çou k’ dji vén di t’ dire t’ a surmint rmouwé l’ åme,
Ca ti véns di t’ dressî tot hatixhant d’ firté
Et tot presse a disfinde tes droets, tes libertés.
C’ est å trefond di ti åme, k’ asteure, dji vén do lére.
Et ti véns do fruzi d’ ene sinte et djusse colere.
A bravo, fré walon ! Come dji t’ admire insi;
Et dji t’ ô gruziner l’ Muette di Portici.
Dispiete tu, fré walon, l’ oraedje hoûle a nosse poite
Mins l’ firté di t’ bele raece, e ti åme n’ esteut nén moite.
Å pilori, les traites, les låtches, les baligants
K’ ont rnoyî leu mandat po plaire ås flamingants !
A bas les djins sins cour, pareys ås pôrchineles !
Nos frans vey a ces-la ki nos volèt mancî
Ki ns estans bedjes, c’ est l’ vraiy… mins Walons po cmincî.
Hårdêyes difoûtrinnes
[candjî | candjî l’ côde wiki]- Bokets del pîce "E payis Noer" (so l' Aberteke)
- L' arimé "Ti doimes, fré walon" (mwaisse modêye) (sol waibe "Li walon d' emon nozôtes")