Jacques Van Melkebeke

Van Melkebeke djouwant on role dins onk di ses "romans-photos" (1960)

Jacques van Melckebeke (1904 - 1983), c' esteut on pondeu eyet dessineu di dvant l' deujhinme guere daegnrece.

Vicåreye et ouve

Il a intré å «Scroté Swer» e 1940 po s’ î ocuper del rawete po les efants. Il î a publiyî Hergé et s’ prôpe binde en imådjes "LE BARON CRAC", a l’ après do baron di Munchhausen. Po wangnî des cwårs, i s’ a metou eto al critike des ôtes pondeus et fé des scrijhaedjes dissu les calindjaedjes pol «Nouveau Journal».

Si l’ popa da Tintin n’ a stî waire riwaitî d’ cresse après l’ Liberåcion, van Melkebeke, lu, bén moens tchanceu, s’ a veyou codåné a 4 ans d’ gayole et dijh ans sins ses droets civikes et politikes. Adon, e 1949, foû del prijhon après seulmint deus ans padrî ses poites, ça l’ a espaitchî d’ co mostrer ses ouves a tertos.

Po viker i s’ a metou a bouter dins l’ ombe da Hergé mins eto dins l’ cene da Edgar P. Jacobs po ses "Blake et Mortimer".

Çou k’ on n’ sait nén bråmint, c‘ est k’ il a felmint ovré a des istweres a shure et les fé mete e fotos po ene soce di gaztaedjes (Real Presse) ki, dins lès anêyes 1960, raenéve foirt po des "magazines" di Beldjike ki publiyént voltî di ces cougnes la di brixhådaedjes.

Ses discôpaedjes estént cåzu des vraiyès bindes d' imådjes åjhey a shure po l’ fotografe ås pîces.

Po s’ plaijhi et a tot ptits tiraedjes, van Melkebeke fijheut des belès graveures di djins do cirke k’ il aléve voltî vir djouwer.

• 
  Egzimpe di ses epådjnaedjes (po ene B.D. e fotos)
• 
  Ene di ses graveures oridjinåle (1966)

Biyografeye

Si biyografeye, sicrîte pa Benoît Mouchart, a rexhou a «Vertige Graphic» avou l’ tite: «A l’Ombre de la ligne claire, Jacques van Melkebeke, le clandestin de la B.D.»