Joseph Vrindts

Èn årtike di Wikipedia.
Potchî a: naiviaedje, cweri

Wiktionary-logo.svg

Li Wiccionaire si rsieve di sacwants fråzes da "Joseph Vrindts" po-z enimådjî des mots k' i gn a.

Joseph Vrindts a skepyî li 7 d' avri 1855 et a morou li 6 di nôvimbe 1940.

I fourit spoté "li prince des fjheus d' rimeas".

Il a fwait tos les mestîs: coibjhî, livrî, cåbartî, bibiotekî.

Il a stî mimbe del Rweyåle Academeye di Langue et Literateure francesse di Beldjike (mins djusse do 9 di måss å 16 di nôvimbe 1940).

Relî dins l' grosse antolodjeye Piron.

Ouve[candjî | candjî l' côde wiki]

dierinne rexhowe di l' årmonak des cwate Matî (1910)

A scrît bråmint des powezeyes e walon, ramexhnêyes dins "Les Boukets tot fwaits" (1893), "Påjhûles rimeas" (1897), "Lingaedje et acsegnance des fleurs et des plantes walons" (1898), "Vî Lidje" (1901), "Viyès airs et noveas resploes" (tchansons, 1907), "Racontroûles et råtchåds" (1920).

A scrît eto on roman "Li pope d' Anverse" (1896), et 23 pîces di teyåte, ki les pus djowêyes ont stî: "On djudi d' fiesse" (1887), "Madame Nonård" (1900), "L' eritaedje" (1900), "Li siermint da Gretri" (1908 & 1928); "Li vî mestré" (sins date).

I rascoda li Pris del Veye di Lidje e 1927.

Il a eto scrît del prôze nén racontrece : Lingaedje et acsegnances des fleurs et des plantes.

Come fijheu d' årmonaks, il esteut dins les askepieus di l' årmonak des cwate Matî (1894). Et l' aplaidî lu tot seu di 1906 a 1910.

Vicåreye[candjî | candjî l' côde wiki]

Li Djôzef Vrindts esteut todi moussî come èn årtisse avou on flo ås racawetes, si cawe d' oronde eyet si tchapea d' batlî. Eto, a divnou ene vicante paskeye di l' istwere des vîs coulots d' Lidje: Sint-Foyin et Djudla Mouze.

Rimimbrances da Djôzef Vrindts el Walonreye[candjî | candjî l' côde wiki]

Vrindts va divnou on modele des belès letes e walon. Djôr Simenon dirè, metans: "Leyîz mu aprinde li mouwant lingaedje da Defrecheux et da Vrindts.

Les soces di belès letes lidjwesses, li Caveau Liégeois eyet La Wallonne, ki skepièt e 1872 et 1892, endè vont fé leu mastoke. Li prumire va drovi on souscrijhaedje publike po lyi fé fé ene posteure, ki serè metowe a l' aite di Robiemont, la k' ele va siervi d' radjoû a mwints Lidjwès. (Mins li posteure a stî hapêye e 1993).

L' anêye 1995 fourit rclamêye "anêye Vrindts", et les minmès soces di belès letes vont vudî on ptit live avou tos scrijhaedjes so Djudla, k' i lomît Floriliège.

Hårdêyes difoûtrinnes[candjî | candjî l' côde wiki]