Les Memweres d' on Namurwès sol vî Nameur (sovnances)

Les Mémoères d'on Namuroès su l'vî Nameur

Les Memweres d' on Namurwès sol vî Nameur (Les Mémoères d'on Namuroès su l'vî Nameur), c' est on live des sovnances da Désiré Baulieu, (1831-1910), rashî e walon pa Joseph Osselet. Li mwaisse-ovraedje est scrît e l' ortografeye da Léopold Godenne. Li live a stî replaidî e scrijhaedje Feller pås Cayés Walons.

Kitaeyaedje do live

Coviete divintrinne di dvant (p. II): Les racsegnes sont-st e walon: Il a stî tiré di ci ovraedje ci 25 egzimplaires so papî moyinådje. / Tos droets rezervés.
Pådje III: foto da Dziré Baulieu.
P. V. Adrovaedje på scrijheu. Li restant do live, c' est li conteu, Dziré Baulieu, ki djåze.
p. 1 a 84: racontaedje da Dziré Baulieu, di ses sovnances.
p. 85: flotches.
p. 87-88: tåve des tites.

Plaeçmint dins l' tins et dins l' espåce

Li live n' a pont d' date. Il a stî imprimé a Salzene. Dins l' adrovaedje, Djôzef Osselet dit ki Dziré Baulieu a morou cwate moes après aveur raconté ses sovnances. Li live a rexhou e 1911. Gn a dins l' live ene contrumasse di racsegnes so Nameur et so l' istwere di 1840 a 1870 (la 40, 50, 60 u 70 ans, dit-st i Djôzef Osselet). On pout dire ki c' est l' prumî live e walon ki dene ostant di racsegnes istorikes.

Çou k' on cåze dins l' live

(li tåve des matires)

Dismolicion des Glacis et des Rampårts
Li Houyou; Li Tchapelle des Rampårts; li Pair Louise-Marie; li Forbot et l' Poite Sint-Nicolai; li poite del Plante; li Rowe des Moléns et l' novea cwårtî Boleaux al coine des rowes; li Martchî des Tchenes et les Trî d' Salzene; ene bele pormoennåde et les poites del veye; li rowe di Fier; li rowe di l' Andje
Les Mnujhîs; li rowe Sint-Djhan; li Grand-Martchî; li Muzêye; li rowe des Moléns; li rowe Notru-Dame; li Tombe des Bråves.
L' eclairaedje; les bernatîs.
Li Nouve Rowe; li rowe des Blankès Dames; li plaece del Comedeye.
Les scoles; li Police; les Borguimwaisses; les Coirneus; les poirteus ås saetchs; li colera di 1842; li colera di 1866; les hablumints; li pris des vives; li tchir tins; les machines a keude; l' eclairaedje; li tchmin d' fier; inoguråcion do tchmin d' fier; les facteurs; li prumî triyeu, Monsieu Cornet
Li prijhe d' Abdel-Kader
On balon; Madame Sakî; Mamjhele Rachelle; on fjheu d' toûs; les Barakes
Les Gazetes; les imprimeus-tipografes; les inondåcions di 1850; li gåre civike.
Les omes celebes; Cavalcåde di Moncrabeau; Daurvillers; Califisse; Li procès Jaumart
Les cwårs; li guere di 1870.
Li Societé corale Sinte-Cicile; les Bardes de la Meuse; Colas Bosret; Moncrabeau.

Corwaitaedjes so l' live

Da Zande des Trîs (Alexandre Gérard), e 1911

« Nos saetchans des memweres d' on Namurwès on plaijhant volume so l' vî Nameur, ki Joseph Osselet î rashonne les sovnances da Désiré Beaulieu, k' a morou l' an passé ås Trîs d' Salzene, a cwatru-vints ans, ene boune paskeye. C' esteut des trevéns ki nosse veye esteut etourêye d' aiwe et k' i faleut payî l' octrwè po passer les ouxh drovous åd triviè des rampårts, ki fjhént come ene cinteure di glaecis et d' murayes a nos rowes et nos martchîs. Li live da Joseph Osselet est ene schourcêye di spitantès paskeyes. C' est on côp d' ouy a l' taxhlete so les djins, les monumints, les uzances do vî Nameur. Tot ça est scrît e walon, come on l' cåzéve å tins des Bosret, des Mimi Suars, des Colson et des Wérotte. Si vos vs vloz fé ene pinte di bon sonk, dabôrd, lijhoz l' ovraedje d' on Namurwès ki voet voltî si vî Nameur. Ça n' costeye k' on franc et cénk mastokes et c' est toplin di belès imådjes. Ç' a stî imprimé amon E. Dubois, rowe Patnî, 11, a Salzene. »