Li walone tchanson di m' payis (tchanson)

Kimince

Li walone tchanson di m' payis (e måmdiyin| Lu walone tchanson du m’ payis, c' est ene tchanson e walon sicrîte pa Henri Bragard et metowe e muzike pa Max Michel.

C' est ene tchanson a môde d' air d' operå.

L' air, les paroles (rimetowes e sistinme Feller, et on ratournaedje e francès ont stî eplaidîs divins « La lyre malmédienne » (eplaidaedje do Rweyå Club walon d' Måmdey, 1966).

Rilomêye

Elle a stî rprinjhe pa Jules Bastin sol sitroete plake « Airs folkloriques wallons ». C' est ç' modêye la k' est rtchantêye pa des ôtes tchanteus ou tchantresses, metans Marie-Catherine Baclin.

Dins cisse modêye la, on n' riprind ki les prumî et troejhinme coplets. Çou ki amoenne on mescomprindaedje å cmince do deujhinme coplet. L’ addjectif « rapåjhtêye », metou al tiesse do coplet, n’ est pus comprindåve, ca i rahouke tot çou k’ est dit e deujhinme coplet, so l' Aiwe di Wåtche.

Tecse del tchanson

Li mwaisse tecse a stî scrît e-n on scrijha di dvant Feller. Vo l' ci cial riscrît e rfondou walon:

I.

Ele tchante e m’ cour et dvins mi oraye,

Li walone tchanson di m’ payis.

Nole pårt, dji n’ etinda l’ pareye ;

Nole come leye ni m’ pout ahåyî.

On direut l’ ramadje do prétins,

On riya di djonnès femreyes

S’ acoirdant l’ dimegne å matén

Al houcåjhe d’ ene distante sounreye (2 côps).

II.

C’ est l’ plinte del Wåtche ezès rotchîs

Et ses djoupes d’ aveur vinki l’ vene,

Li brutinaedje do ri e l’ hé

Et les clairès games del Wartchene ;

Et s’ i lyi prind d’ groûler télfeye

Et d’ emonter avou l’ måle bijhe

K’ ashofele do waeraxhe payis,

I n’ lyi deure ki l’ valeur d’ ene brijhe (2 côps)

III.

Rapåjhtêye, elle est l’ tchant d’ l’ oujhea,

Li son d’ ene cloke birçant l’ sofrance ;

Elle est tofer ezès coxheas

Li fiestixhante vwès do vint d' France.

Insi tchante-t ele divins mi oraye,

Li walone tchanson di m’ payis.

Nole pårt dji n’ etinda l’ pareye ;

Nole come leye ni m’ pout ahåyî (2 côps)

Hårdêye difoûtrinne

• Modêye e scrijha Feller (sol waibe "Li walon d' emon nozôtes")
• Hårdêye eviè ene videyo del tchanson (sol Tévé walon-cåzante), prezintêye (so l' Aberteke)