Lucien Gaspar

Èn årtike di Wikipedia.

Li Wiccionaire si rsieve di sacwants fråzes da "Lucien Gaspar" po-z enimådjî des mots k' i gn a.

Lucien Gaspar (e walon, sicrît Lucyin), ki sinéve ses scrijhaedjes Elgé, a skepyî li 1î d' fevrî 1926, a Beamont-dlé-Ståvleu. Il a morou li 19 di djulete 2008.

Il a cmincî a scrire e walon… a scole a Lôdômé, … tot metant des mots d' walon dins ses redaccions e francès.[1]

A metou ses bokets (tos arimés) sol pitite gazete "Les Echos de Stavelot" e 1979, et dispu don, cåzu totes les samwinnes. End a bén yeu 1300. Sacwants d' zels fourît rashonnés en on live "Ene pormoennåde di rimes et d' arimés" (One porminâde du rimes èt d'ârimés). Ci live la a stî eplaidî pal comene di Ståvleu e 1998.

A moussî å Rweyål Club walon d' Måmdey diviè 1996, sol no di Fré Luk.

Justine Zander, a wangnî on côp li bate des "mamjheles lingaedje" avou on boket da Lucyin Gaspar.

Di s' mestî, il esteut cinsî.

Lucyin Gaspar n' est nén parint avou Camille Gaspard, mins l' a foirt bén cnoxhou.

Èn arimé da sinne[candjî | candjî l’ côde wiki]

Li ci k' i lét l' pus voltî :

Dj' î a pinsé
Cwand k' a m' grand-mere, dji bribéve on bonbon
Ele mel dinéve tot m' fiestixhant les tchveas,
Mi rabressî, et m' serer did tot près
Dj' aléve so s' schô et schoûter ses tchansons.
Ele mi mzureut al paroe del coujhene,
Avou ene croye, et fé ene roye sol meur,
Dj' aléve djouwer, pu rivni fé on toû:
So dj' co crexhou? Racsurè dj' mi cuzene?
Ele mi trovéve tofer totes sôres d' escuzes,
A mes xhinêyes ou bén a mes biestreyes,
Adon ki m' pere mi saetchive pa ls orayes:
Leyîz l' trankile, i nel fwait nén pa rujhe.
Ele fout malåde ki dji cwitéve les scoles,
S' a-t ele plindou? Dji n' l' a djamåy savou,
Ele soriya cwand k' ele m' out ricnoxhou.
Mi dj' aveu håsse et dji passéve al vole.
Tinoz dit-st ele, c' est vos k' årè m' tchaplet,
Dj' a priyî dsu por vos cwand vs estîz ptit,
Vos n' åroz k' a dire ene påter por mi,
I s' pout k' on djoû vos î pinsroz motoit.

Hårdêyes difoûtrinnes[candjî | candjî l’ côde wiki]

Sourdants[candjî | candjî l’ côde wiki]

  1. Responda da Lucyin Gaspar pa Joseph Docquier, Lucyin Mahin & Pablo Sarachaga li 22 d' octôbe 2007.