Marc Dewart
Marc Dewart, c' est on scrijheu e walon k' a skepyî a Måmdiy.
Di s' mestî, il a bouté å ministere del djustice, tot montant d' gråde disca s' pinsion.
Ouve pol walon
[candjî | candjî l’ côde wiki]Il a scrît on live so les cwårdjeus a Måmdiy: Anciens jeux de cartes à Malmedy et aux environs.
Divins li troejhinme tôme del coleccion «Scrijhaedjes d' ir et d' ouy», il a scrît èn arimé so tos les persounaedjes do cwarmea d' Måmdiy.
Il a scrît des bokets po «Lu vî Sprâwe».
E 2024, I prinda pårt å cåbaret walon di Limerlé avou Patrick Allard.
Onk di ses prezintaedjes djåzés
[candjî | candjî l’ côde wiki]Po prezinter si powinme sol persounaedje do sotea å cwarmea d' Måmdiy å cåbaret d' Limerlé, i rmimbra les ledjindes so les nûtons, aprume li cene do nûton hanteu. Vola l' tecse riscrît e sistinme Feller sorlon l' cåzaedje eredjistré adon:
Totavâ, on a dès lèdjindes qu’ont à vèy avou lès sotês èt lès massotês. Paç’qu’on sotê, c’èst cwè ? On p’tit sot. On p’tit sot qu’èst lêd. Èt totes lès lèdjindes duhèt quu lès sotês, bé, c’ est dès djins qui n’ sont nin bês, qu’on n’ vout nin vèy. Il ovrèt tote nut’. On luzî apwate, al nut’, dès solés à rusmèler, ou mète dès novês nâlîs. Oubin, c’ èst dès fèrblântîs, èt on luzî pwate ossi on posson ou ‘ne afêre éssi. I prindèt çoula. I rintrèt èzès trôs – on n’ lès veût nin. Il ovrèt tote nute, èt â matin, l’ovrèdje èst fêt.
Èt tins-in-tins, n a on sotê qui mousse foû di s’ trô, qui s’ risquêye on pô pus lons’, èt i veût lu vrây monde. Èt lu vrây monde, c’ èst qwè ? C’è-st-ossi dès bèlès bâcèles. Èt lu, i s’ dit : « dju so tot p’tit, dju so tot lêd ; dju n’ va jamês p’leûr hânter one bèle fèye. Èt portant, i n a d’ cèsses qui fuzèt lès cwânses. Èle su lèyèt on pô hânter. Pocwè ? Paç’qui l’ pôve ome luzî fêt dès bês cadôs. I r’fêt dès solés por lèye ; i r’fêt dès solés po tote lu famile. Èt lu famile dol djonne bâcèle, èle su pwate bèng. Èle su pwate todi mî. Èt lu, il a todi pus’ d’èspwar. Èt on moumint d’né, on su d’mande djusse : « Cumint va-dj’ fé po ‘nn’ èsse cwite, du çust ome la ? »
Èt lès lèdjindes duhèt todi, dvins nosse réjiong – èt on-z a intèrojé dès vîyès djins, dès vîs d’ol fin dès-anés dî-hût’ cints, qui racontèt cès lèdjindes-là – èt qui duhèt : « cwand lu sotê, on l’ rutchèsse, on l’ tchèsse vôye, adon i duhéve : « du pâte à pâte, dj’a v’ni, èt du djâbe à djâbe, tu fôrtune ènn’ îrè. » Çou qui vout dîre : tot doûç’mint, tu m’as pris dès çâns, èt d’on côp, tu n’ârès pus rin. Èt on dit d’abitude quu c’èst l’ mâleûr.[1]
Sourdant
[candjî | candjî l’ côde wiki]- ↑ riscrît pa Lucyin Mahin, ki l' aveut eredjsitré li 23 d' djun 2024 å cåbaret walon esteut adjinçné pal soce «Périple en la demeure» (voyaedje e l' dimorance).