Fåve do nûton hanteu

nûton ki tént s' cour trawé d' ene fritche, el Pologne

Li fåve do nûton hanteu, c' est ene des pus cnoxhowes fåves so les nûtons.

Disrôlmint

On nûton vout hanter avou ene djonne feye do viyaedje. I lyi a poite tos les djoûs ene påte di frumint, tantea ki l' famile divént ritche.

Mins l' crapåde vout aler å bal s' amuzer come les ôtes avou les djonneas do viyaedje. Li nûton est djalot, et il evoye li måleur sol famile di s' binamêye, tot djhant «påte a påte, dji t' les a amoenné, djåbe a djåbe dji t' les rsaetchrè». Oudonbén : «di påte a påte ont vnou tes béns; di djåbe a djåbe, il endè riront».

Ene ôte manire di s' è mete cwite, c' esteut k' el nûton trouve li båshele ki tchiyeut et magnî e minme tins.

Dins les belès-letes e walon

Li fåve si rtrouve sacwants côps dins les belès letes e walon.

Modêye gåmesse

Niké, li ptit nûton, ene binde d' imådjes da Jean-Claude Servais dessinêye e moes d' setimbe 1980, ratournêye e walon pa Lucyin Mahin.

Cial, li nûton va prinde les traits do djonne ome k' a fwait l' dicåce avou l' båshele et aler touwer li cåbartî et haper les cwårs, et çoula divant on temoen, li serveuse do staminea. Les djindåres metèt l' djonne ome e l' pote. Li båshele end est tote dibåtchêye, et rtchesse Niké.

Ci-ci, po s' fé pardoner, va s' candjî e moenne kifesseu, moussî el gayole; adonpwis, discandjî ses mousmint avou l' djonne ome, ki va insi rexhe di prijhon. Li novea prijhnî, lu, si va candjî e porchinel.

Modêye d' Ôvîfa

Dins l' binde d' imådjes metowe dins les rawetes do Motî Lejoly, c' est on dûhon ki vént veye ene kinoxhowe famile d' Ôvîfa, les Tîsse el Coulêye. Tot leyant leu feye hanter avou on dûhon, i divnèt foirt ritche, disk' a aveur li tîce do viyaedje. Po s' mete cwite do dûhon, li djonne feye va trover ene viye feme ki lyi dene li scret (si mostrer å dûhon ki tcheye et magnî e minme tins). Cwand l' dûhon eva, i dit s' mådixhante fråze, et les Tîsse el Coulêye divnèt foirt pôves.

Modêye di Båclin

Ele fourit scrîte pa Philippe Bauduin k' el lijha a èn ocupaedje coinrece del fiesse ås lingaedjes walons 2015.

Hårdêye divintrinne

• Prezintaedje avou l' accint d' Måmdiy (da Marc Dewart, eredjistrumint et tecse riscrît e Feller).

Hårdêye difoûtrinne

so Wikisourd: Li viye fåve do_måssotea d’ Båclin