Messe des trepassés

Ene messe des trepassés, c' est ene messe k' on dit å djoû des åmes, po tos les moirts d' ene pårotche.

Dins sacwants viyaedjes, on adjinçnêye ene passêye li djoû des åmes po-z aveur des cwårs po ricmander les moirts ki n' ont pupont d' parintêye.

On djheut eto ene messe des trepassés li londi del dicåce.

Tos les djins ralént a leu viyaedje pol messe des trepassés.

Divant l' messe des trepassés, l' aite aveut stî gårni d' potêyes di fleurs et les tombes avént stî fwaites. Après messe, li curé aléve e porcession eviè li çmintire, et beni les tombes.

Al Tossint, les cis ki n' savént aler a messe des trepassés alént a vepes des moirts.

Les ricmandijhes des moirts

Tins del messe des trepassés, on ricmandéve tos le moirts. On payive li curé po lomer les moirts di s' famile. Les ricmandaedjes si djhént estô do pretchmint. I s' dijhént e francès. On payive al lene di ricmandijhe. Li pus simpe, c' esteut :

Albert Collignon et son épouse pour tous leurs parents défunts

Mins des djins k' i gn a inmént bén fé ricmander des parints k' elz avént gåté.

Adolfe Schul pour sa soeur Romaine, son parrain Georges Delaite, son père, sa mère et autres parents défunts.

Les ricmandaedjes ont stî arestés après l' concile Vatican II (diviè 1975).