Michel de Grandmont

Èn årtike di Wikipedia.
Sauter à la navigation Sauter à la recherche

Michel de Grandmont (on dit eto de Grammont) a skepyî a Paris e 1645. Il a disparexhou dins l' mer å nôr-ess des iyes Carayibes, e moes d' avri 1686. Il a pratiké l' mestî d' corsaire, et pu d' flibustî di 1670 a 1686. Il naivyive sol bateale Hardi”.

Biografeye[candjî | candjî l' côde wiki]

Michel de Grandmont esteut l' fi d' on djintiome "officier des Gardes". A l' ådje di catoize ans, i towe e duwel èn oficî, k' esteut l' galant di s' sour. Adon, il est aresté, et codåné. Po s' poenne, il est oblidjî di s' egadjî dins li scole des mousses. Adonpwis, il interrè å "Royal Régiment des Vaisseaux".

I s' fwait bénrade rimarker, pask' il est coraedjeus et k' il a on timperamint di tchîf. Dabôrd, i va passer raddimint å posse di comandant d' on batea egadjî conte li flote des Espagnols. I naivyive adon å lådje des iyes del Tortuwe et d' Sint-Domingue.

Cwand l' France mousse e guere avou les Bas Payis e 1678, il atake l' iye holandesse di Curaçao, et prinde li comandmint del flote des corsaires do Rwè d' France ki naivyént di ç' costé la del Daegne.

E moes d' djun 1678, il egadje shijh bateas d' guere et 700 omes conte les colneyes espagnoles do Venezuela, et intrer dvins les teres disk' a l' veye di Trujillo.

Nén contin d' ça, i fwait èn ôte atake di nute dins l' pôrt Venezuelyin di La Guaira, et prinde li pôrt. Mins il est ene miete trop seur di lu, et c' est avou bråmint des rujhes k' i schape a des grossès foices espagnoles k' avént vnou å scours del veye.

E 1679, c' est les veyes di Toulha å Braezi, Puerto Cabello et Vera Cruz å Mecsike ki toumèt, ene après l' ôte. Tandis k' e 1680, c' est å toû di Cumana di tchaire dins ses mwins.

E moes d' may 1683, avou l' flibustî holandès Laurens de Graaf, i rprind Vera Cruz. I piyèt l' veye et fé 4000 prîjhnîs k' i discandjèt conte ene rançon.

E 1685, les deus omes rinovlèt leus atakes abeye dins l' veye mecsikinne di Campeche.

Tot ça lyi a valou d' esse lomé lieutnant do sud di l' iye di Sint-Domingue pa li rwè d' France. Mins il n' a djamåy ocupé ci posse la pask' il a fwait on dierin voyaedje el mer divant l' arivêye di s' brevet et disparexhe e moes d' avri 1685.

Alére[candjî | candjî l' côde wiki]

  • De Fontinières. "L'histoire des aventuriers, des boucaniers et des flibustiers d'Amérique". (1686)
  • M. Besson. "Les Frères de la Coste, flibustiers et corsaires". (1928).
  • Funck-Brentano. "L'île de la Tortue". (1929).
  • Georges Blond. "Histoire de la flibuste". (Stock, 1990) - ISBN 2-234-02291-6.
  • Pickering, David. "Pirates". CollinsGem. HarperCollins Publishers, New York, NY. pp-59. 2006.