Nonne (priyire)

Li priyire di Nonne, c' est l' 7inme et l' dierinne priyire del djournêye, ki les moennes dijhnut cwand il ont yeu magnî a nonne, et e cwareme divant d' awè magnî. Elle est l' imådje del moirt da Djezus-Cri sol croes.

Li nonne a 3 såmes, ene îme et on boket d' priyire.

Li priyire di nonne ni s' dit nén a nonne, mins a 3 eures di l' après-nonne. Douvént ?

Li mot walon "nonne" provént do latén nona (nouvinme), priyire del djournêye, k' egzistéve dedja amon les Djwifs, pu rprinjhe pås crustins.

Å cmince, on l' dijheut al nouvinme eure (did la ci no), çou ki, ene såjhon dins l' ôte, riprezintéve 3 eures di l' après-marinde, adon kel priyire del vesprêye (vespera) si djheut a solea djus.

E 6inme sieke, sint Bnoet adjinçnêye les rîles po les moennes, avou l' idêye padrî l' tiesse di spårgnî les tchandeles ki broûlént a non-syince – sapinse lu – dins l' eglijhe et les tchambes des moennes après l' anuti. Adon, i va ravancî li priyire nona et l' mete docô après l' marinde, et minme divant l' marinde e cwareme.

Ça fwait kel vespera, dabôrd, si va dire bén dvant l' anuti, po les moennes aler coûtchî avou l' solea.

Li veye des ptitès djins s' a erîlé sol veye des moustîs. Eto, nonne a divnou li mitan del djournêye, dabôrd ki li vesprêye divneut, e sacwantès plaeces, l' après-nonne.