Raiwaedje des prés (istwere)

Li raiwaedje des prés, c’ esteut mete di l’ aiwe so les setchs prés, a pårti des bîs d’ raiwaedje, k’ avént stî cåvlés esprès po ça.

Discrijhaedje

Les bîs d' raiwaedje prindént l’ aiwe e-n amont, et dischindént pus doûçmint ki l’ mere d’ aiwe (li mwaisse ri), so les pindants des tienes.

On fjheut disvaler l' aiwe do hôt bî so des bîxhons ou soxhes (pitits ravås foyîs e tere). Cwand l' pré esteut bén frexh, on bouléve les broûs et les framujhes (molinêyes). On raiwéve pus voltî les djoûs d' lavasse (foitès plouves).

Cwand gn aveut bråmint des prés a raiwer, tchaeconk aveut l’ droet a on djoû d’ raiwaedje (tournêye d' aiwe). Del nute, gn aveut cobén do frawtinaedje, k’ amoennéve des margayes. Li ci k’ esteut padzo vos aléve dibrôler voste astantche po-z awè l’ aiwe dipus k’ a s’ toû. Portant, li ci k'aveut l' aiwe so s' pré li semdi a meynute l' aveut po 24 eures (on n' åreut nén oizou lyi rprinde li dimegne).

Istwere

Come bråmint des vîs alaedjes, ci sistinme la n’ a nén sorviké å 20inme sieke. Avou les ecråxhes tchimikes, les fours di tchamp estént ossu bons k’ les fours di pré.

A cmincî des aneyes 1950, on-z a rplanté les prés avou des sapéns (epiceyas).

Alére

Lucyin Mahin, Li raiwaedje des prés, Ene båke so les bwès d' l' Årdene tome II, 9inme shijhe.