Raymond Leblanc

Èn årtike di Wikipedia.
Sauter à la navigation Sauter à la recherche

Raymond LEBLANC fourit l' askepyî del gazete di bindes d' imådjes "Tintin" eyet des eplaidreyes do Lombard.

vicåreye[candjî | candjî l' côde wiki]

Il a vnou å monde a Tronquoy, li 22 d' may 1915. A troes ans i lijhéve et conter dedja comifåt. A 11 ans i fwait ses scoles å Nou-Tchestea.

Il åréve volpu fé docteur mins, l' prumî d' djanvî 1932, k' il a 16 ans, il ast oficir des dwânes a Brussele. Il a stî l' deujhinme dissu 800 k' ont passé l' egzamin po wangnî l' plaece.

Lieutnant e 1940, i rtoûne en erî divant les Almands et s' ritrover e l' Olande. E 1941, i fwait passer les gazetes ki rexhnut a muchete dizo l' nez des evayixheus. E 1942, rivnou ås Dwânes, i s' fwait mimbe do "M.N.R." (Movmint Nåcionå Rweyalisse). Li 3 d' setimbe 1944, i fwait prijhnîs ene pitite pougneye di sôdårds almands k' alént fé peter e l' air les bastimints des dwanes di Tour et Tacsi.

askepiaedje del gazete TINTIN[candjî | candjî l' côde wiki]

E 1945, l' idêye lyi vént d' fé ene gazete ki s' lomréve TINTIN avou les bindes do minme no. L' aroke c' est ki Hergé n' est nén bén veyou la k' i n' s' a nén ritourné, lu, po bouter, tins del guere, avou l' Råvlé-Swer. Ci n' est nén po djoker nosse Raimond. Avou s' C.V. d' rezistant, il a l' bresse long et arive a arindjî les bidons. Li 22 d' decimbe 1945 li dossir d' Hergé est tapé å parfond d' on ridant et, å moes d' may 1946, on lyi dene on bea certificat d' civisse. Li 4 d' octôbe 1946, Hergé est otorijhî a s' rimete a ovrer. I gn a ût djoûs ki l' prumî limero del gazete TINTIN a stî metou a vinde.

Li popa da Tintin avéve dimandé a onk di ses soçons d' arindjî comifåt les pådjes do magazine. Labele, lu eto avéve bouté po l' Sicroté-Swer (ene binde a l' après do Baron d' Munchhausen) et esse moens pezant. Jacques Van Melkebeke, k' i s' loméve, a stî metou a l' ouxh et s' rade ritrover å yoyo. Li 29 d' octôbe 1947, Fernand Demany, deputé, avéve riclamé a l' Tchambe: "Ôtrumint, avéve-t-i dit, i fåt djoker d' fé parete li gazete TINTIN."