Schite ås veas å virûsse BVD

Èn årtike di Wikipedia.
Erodaedje al linwe dins on cas d' maladeye des finès peas

Li schite ås veas å virûsse BVD (en inglès : Bovine Virus Diarrhea), c' est ene schite, come di l' aiwe, ki les veas di moens ki shijh moes atrapèt cobén. Ele si prind åjheymint d' on vea a l' ôte. Pa côps, ele acsût eto des pus viyès biesses.

Dilé l' schite, gn è pout aveur, avou, del tosse et del peumoneye.

Li biesse riwerixh so ene cénkinne di djoûs.

Li virûsse BVD est eto l' cåze d' ene ôte maladeye, k' on lome li maladeye des finès peas (inglès : mucosal disease). Cisse-ciale djond les åmeas et åmayes (inte 6 et 30 moes, dabôrd). Ele ni s' prind nén d' ene biesse a l' ôte.

Ci côp cial, li schite ni rwerixh nén, et fini pa fé crever l' biesse, divins les 10 djoûs. E minme tins, on-z a do gletaedje, del nåze, et do breya. Li five dimeure fele, inte 40 et 41 °C. C' est on tåvlea foirt rishonnant å ci do catåre malén.

Å discôpeçaedje, on trouve di l' efouwaedje el boke, avou des botchrês d' erôdaedje. Eto dins l' avaloe.

Dispu k' on cnoxhe l' aloyaedje des deus maladeyes, on l' lome cobén l' intité, d' après les sigues en inglès, BVD/MD.