Sinne e walon del pîce da Klairwal so les schaesseus d' Nameur

Li sinne e walon del pîce da Klairwal so les schaesseus d' Nameur rimimbere li grande bate des schaesseus k' i gn a yeu a Nameur li 31 di may 1774 po l' vizite di Miyin d' Otriche, li fré da l' Impreu Djôzef II.

Klairwal on fjheu d' pîces di teyåte francès k' esteut la, decida di scrire ene pîce di teyåte po rinde bon dvwer ås schaesseus.

Ele serè djouwêye e teyâte di Nameur li 9 di djun 1774.

C' esteut l' môde des pîces di teyåte avou do patwès dvins. Dins les persounaedjes, gn aveut des ptitès djins ki cåzént dins leu patwès.

Dins l' pîce da Klairwal, al 6inme sinne, gn a on payizan et s' feme, Tibå et Perete, ki dvizèt e walon avou Sofiye, ene bordjoesse, ki s’ galant esteut l’ capitinne des Avresses (ene des ekipes).

Po scrire cisse sinne la, on-z a les pinses ki Klairwal aveut on copleu namurwès, mins ki n' s' a nén fwait cnoxhe.

Tecse do cåzaedje e walon

Sourdant : Memwere di licince da Suzanne Simon, La littérature dialectale à Namur au XVIIIème siècle, 1967.

Tîbåd a Sofiye, k' est dmorêye e s’ måjhon.

Tibå : Cwè çki vos fjhoz vaici tote fene seule, Mamjhele ? Vos estoz bén pô curieuse ?

Sofiye : Le combat est-il fini ? Quel est le vrai vainqueur ?

Tibå : Dji n’ è sai pardiene rén, mins dji croe ki ça serè béntoit fwait ca dji les a veyou bouter come des araedjîs. Vola tot çki dji vos pou dire Dj’ aveu bén ôte tchoi ki nos asblawixheut les ouys. Pardiene ki nos avans veyou des belès dames et des beas monseus ki fjhént l' cou a ç’ binamé Prince.

(À Perrette) Mins di don, comere, vo vs la come one estourdeye ?

Perete : Oyi, noste ome, dji so co tote emerviyeye. Dj’ a poenne a m’ è rawè ; non, gn a rin dins l’ monde di pus bia a vey ki ç’ tchir Prince. C’ est k’ il a èn ouy si doûs k' i shonne vos dire : dji vou k’ vos m’ inmîxhe, dji n’ so k’ èn ome come vozôtes et si dji vén on côp a esse vosse mwaisse, dji n’ m’ è sovénrè ki po vos fé a tertos do bén. Oyi, noste ome, dj’ a lî tot çoula dins ses oûys, i n’ vout nin do respet. I n’ vout ki d’ l’ amour. Et, ma fwè, nos l’ sievrans a s’ plaijhi car nos l’ inmans di tot nosse cour.