Skernaxhes (arimés)

Èn årtike di Wikipedia.
Sauter à la navigation Sauter à la recherche
(coviete do live)

Skernaxhes (Skèrlaches), c' est on live d' arimeas sicrîts pa Ben Genaux. Li live est raloyî sol pitit costé. Il a vudî e 1969.

Les rimes sont sovint ritches, mins sins trop spepyî so les etchinnaedjes. Li pîtaedje est libe, mins pus sovint, c' est des foirt courts vers.

Pol prezintaedje so papî, les strofes sont metowes a môde d' egrés.

Sol coviete, li scrijheu s' a dessiné.

Bråmint des arimeas mostrèt li disbåtchance di l' oteur, e bisbrouye avou ene djin k' i voet voltî (si feme, si feye, ene nouve mayon sititcheye på diåle di l' après-nonne ?)

Èn arimea foû di "Skerlaxhes"[candjî | candjî l' côde wiki]

Dimegne
Dimegne,
Co todi dimegne...
Des eures et des eures
A tourner come ene biesse di gregne,
Sins vir el coleur
Di vos iys; sins pus sawè
Çou k' est cron, çou k' est droet.
Dimegne,
Co todi dimegne...
Des eures et des eures
Sins vir persone
Come si dj' sereu dins l' daegne.
Paski fouxhoz bén seur,
S' i gn a ene sakî ki soune,
C' est k' i s' a brouyî d' ouxh.
Dins ké trô fåt i ki dj' mousse
Po n' pus etinde les djins
Ki pasnut so m' trotwer ?
Po n' pus etinde les gaméns
Djouwer al machine dins les poûssires ?
Po n' pus etinde li brut di m' cour
Ki toûne a sot ?
Dimegne sins coleur,
Dimegne di trop;
Fayé dimegne ki ndè finit nén;
Mannet dimegne k' i fåt uzer, uzer,
Ene munute å côp
Ene a ene …
Ostant m' mete ene coide dins m' cô.
Pus ni vijhén ni vijhene :
C' est dimegne po tertos
Ey on va pormoenner, endo?
Il ont metou,
-Cwè çki t' vous -
Leus belès lokes so leu dos
Po ndaler vir el dicåsse.
'
Pocwè fåt i ki l' tourniket, sol plaece
Toûne et racatoûne dins m' tiesse,
El ki m' cour bouxhe di cresse
Avou ses viyès årgudinnes ?
Pocwè n' nén vudî avou ls ôtes ?
On m' dinrè ptete on boket d' tåte
- Panse plinne, å rvey mårene -
Et dj' rinterrè ptete a totes les eures
Sô d' bire, di betchs et d' plaijhi ?
Nonna! Dji n' mi sin nén l' coraedje
Èm cour est nåjhi,
Ptete ki dj' n' a pus l' ådje ?
Fåt croere ki dji n' l' a djamåy yeu ?
Bon, c' est dimegne et dj' a peu,
Si dj' va sol plaece,
Di vos vir
Rire
Al dicåce.
Et nos dvrîs fé
On gros shonnance-di-rén;
Nos rwaitî sins nos vir.
Vos savoz bén
K' i gn a rén d' pus pire.
Fayé dimegne al crosse di tåte…
Ratindans l' samwinne
Paski, ç' dimegne ci,
Come tos ls ôtes,
C' est on dimegne
K' i fåt uzer, uzer,
D' ene munute a l' ôte,
Sins nos pårler …
Dimegne, co todi dimegne;
Dimegne
Di kegn.

Hårdêye difoûtrinne[candjî | candjî l' côde wiki]